“Problemlərdən biri ondan ibarətdir ki, biz sürücüləri paytaxtın mərkəzindən sanki kənarlaşdırmışıq, onlar da məhəllələrə gedib avtomobillərini necə gəldi saxlayırlar. Çünki parkinq üçün pul ödəmək istəmirlər. Nəticədə sözügedən məhəllələrdə xaos yaranıb. Sanki biz evimizi təmizləmək adı altında zibili gizlətməklə məşğul olmuşuq. Fikrimcə, bu, düzgün yanaşma deyil və problemin köklü şəkildə həllinə xidmət etmir. Bu barədə də düşünməliyik. Amma ümumilikdə “azparkinq” layihəsini dəstəkləyirəm”.
Bunu Milli Məclisin İqtisadi siyasət, sənaye və sahibkarlıq komitəsində keçirilən ictimai dinləmədə deputat Naqif Həmzəyev bildirib.
Millət vəkili qeyd edib ki, avtobusların hərəkət istiqamətləri, marşrutlar seçilərkən yanlışlıqlara yol verilir: “Yusif Səfərəliyev küçəsində avtobus “Sevgi” parkının qarşısındakı dayanacaqda saxlayır. Daha sonra sola hərəkət edərək geri qayıdır. Bu zaman ərazidə tıxac yaranır. Avtomobillər bir neçə dəqiqə orada məcburi şəkildə dayanmalı olur ki, həmin avtobusa yol versinlər. Halbuki avtobus Babək Prospektinə doğru hərəkət edib oradakı körpünün altından geriyə dönüb qayıtsa buna 2 dəqiqə sərf edəcək, amma bununla tıxacın qarşısı alınacaq. Bunun kimi onlarla misal çəkmək olar. Aidiyyəti dövlət qurumları və məsul şəxslər bu problemləri görməli, həll etməyə çalışmalıdır. Əks halda biz şəhərdə tıxac probleminin həllinə nail ola bilməyəcəyik”.