“Bu gün içməli suda problemlər olduğundan insanlar su filtirlərindən istifadə etməli olur. Lakin bazarda ən müxtəlif qiymətlərə su filrtləri satılır. Amma onun keyfiyyətinə nəzarət olunmur”.
Bunu deputat Naqif Həmzəyev parlamentdə “Ölkənin su təsərrüfatı: problemlər və yeni çağırışlar” mövzusu ilə bağlı keçirilən dinləmələr zamanı deyib.
Deputat təklif edir ki, bazarlarda satılan su filtrlərinə nəzarət olunmalıdır. “Bu gün istifadə etdiyimiz sular bir çox xəstəliklərin mənbəyidir. Təmiz su içmirik. Bir yandanda keyfiyyəti bəlli olmayan bu su filtrlərini əlavə etsək, o zaman mənzərə aydın olar. Gəlin özümüzü aldatmayaq. Əgər problemi həll etməsək, daha pis durumla üzləşəcəyik”, - o qeyd edib.
Deputat Vüqar Bayramov isə deyib ki, təmsil etdiyi Füzuli rayonunda içməli su ilə bağlı ciddi problem var: “Hətta bir çox hallarda insanlar evinə gələn qonaq üçün çay dəmləməyə su tapa bilmir”.
Deputat Məşhur Məmmədov isə deyib ki, bu gün Bakıya köçün əsas səbəblərində bir də onların yaşadıqları bölgələrdə su problemidir: “Bu köç də öz növbəsində gələcəkdə Bakıda və Abşeronda ciddi problemlərə yol açacaq. Ona görə də bölgələrdə vətəndaşlar etibarlı su təchizatı ilə təmin olunmalıdır. Su problemi həll olunmazsa bölgələr, kəndlər getdikcə boşalacaq”.