Naqif Həmzəyev: “Ekologiya və Təbii Sərvətlər Nazirliyi erməni işğalının ekoloji nəticələrinə qarşı uğurla mübarizə aparır”
“Qarabağda əkilən hər ağac uğurumuz, qürurumuz, sevincimizdir”.
Bunu açıqlamasında millət vəkili Naqif Həmzəyev bildirib. Millət vəkili Vətən müharibəsindən dərhal sonra işğaldan azad edilən ərazilərdə meşələrin bərpası istiqamətində atılan addımların təqdirəlayiq olduğunu bildirib:
“Dövlətimiz Vətən müharibəsindən dərhal sonra işğaldan azad edilən ərazilərdə meşələrin və yaşıllıqların bərpasına başladı ki, bu proses bu gün də tam miqyasda davam etməkdədir. Ekologiya və Təbii Sərvətlər Nazirliyi erməni işğalının ekoloji nəticələrinə qarşı uğurla mübarizə aparır.
Bildiyiniz kimi, Ermənistan torpaqlarımızı işğalda saxladığı 30 ilə yaxın müddət ərzində meşələri kütləvi şəkildə məhv edib, yaşıllıqlara divan tutub, ekoloji tarazlığı kobud şəkildə pozub. Hətta Vətən müharibəsinin gedişində belə ermənilərin meşələri yandırmaq cəhdlərinə şahid olduq. Bu gün isə dövlətimizin səyi, əlaqədar qurumların fədakarlığı sayəsində artıq Qarabağda on minlərlə ağac əkilib, yaşıllıqların bərpası istiqamətində mühüm layihələrə start verilib. Bütün bunlar Prezidentimizin bilavasitə nəzarəti altında həyata keçirilir. Hansı ki, Ekologiya və Təbii Sərvətlər Nazirliyi bu məsələdə ciddi aktivlik nümayiş etdirir. Mən buna görə Ekologiya və Təbii Sərvətlər Nazirliyinə, eyni zamanda, Qarabağın yaşıllaşdırılmasında iştirak edən bütün qurum və fərdlərə öz təşəkkürümü bildirirəm. Əminəm ki, doğma Qarabağımız yaxın gələcəkdə öz əzəli gözəlliyinə qovuşacaq, ecazkar təbiəti ilə hər kəsi heyrətləndirməkdə davam edəcək”.
