Xəbər verdiyimiz kimi, tanınmış idmançı Kamil Zeynallı Rusiyada saxlanılıb.
O, videomüraciətində bildirib ki, ölkəyə qayıdarkən, Moskva aeroportunda saxlanılıb.
Kamil Zeynallı Ermənistan tərəfindən beynəlxalq axtarışa verildiyini və onların tələbi ilə saxlanıldığını vurğulayıb.
Milli Məclisin deputatı Naqif Həmzəyev açıqlamasında bildirib ki, Kamilin həbsi Ermənistan hüquq-mühafizə orqanlarının istəyi əsasında olub:
"Kamil Zeynallı ictimai fəaldır və cəmiyyət tərəfindən sevilən adamdır. Xüsusilə də 2-ci Qarabağ savaşının gedişində o, bir çox proseslərdə aktiv iştirak edib. Sonrakı dövrdə də qazilərin, şəhid ailələrinin yanında olub. İdmançı olaraq da, sağlam həyat tərzini təbliğ edən şəxs olaraq da mühüm işlər görür. Onun fəaliyyəti erməni əsilli blogerlər tərəfindən fərqli qarşılanırdı. Ona qarşı müəyyən təhqiramiz işlər görüldüyünü biz mediadan oxumuşuq. Mən düşünürəm ki, Ermənistanın və Ermənistan hüquq-mühafizə orqanlarının istəyi əsasında ola bilər ki, həbs-qətimkan tədbiri seçilsin. İstənilən bir dövlət axtarış verdikdə həm İnterpol vasitəsilə və yaxud dövlətarası saziş olduqda qarşılıqlı olaraq bu işlər həyata keçirilir. Bu, birinci ehtimaldır. Azərbaycanın Rusiyadakı səfirliyi bu hadisəni birbaşa nəzarətdə saxlayır. Yəqin ki, gün ərzində məsələnin detallarını daha ətraflı biləcəyik. Mən inanmıram ki, Kamil Zeynallı tərəfindən Rusiyada hər hansısa bir narahatedici hadisə törədilsin. Elə bir ehtimal mümkün deyil. Böyük ehtimal bu, ermənilərin istəyi ilə həyata keçirilib”.
Naqif Həmzəyev bildirib ki, Kamilin həbs olunması hazırda Azərbaycanda həbsdə olan Ruben Vardanyanın şəxsi istəyi və ya ona bağlı olan qüvvələrin istəyi əsasında da ola bilər:
"Kamilin həbsi Rusiya hüquq-mühafizə orqanları yəqin ki, Azərbaycanın müdaxiləsindən sonra Azərbaycan vətəndaşının hüquqlarını qorumaq məqsədilə bu prosesi dayandıracaq. Elə cinayətkarlar var ki, hansı ki, Xocalı faciəsində cinayətlər törədiblər, Qarabağ savaşında aktiv iştirak ediblər. Ola bilər ki, birbaşa Ruben Vardanyanın (Hazırda Azərbaycanda həbsdədir) onun şəxsi istəyi əsasında və ya ona bağlı olan qüvvələrin istəyi əsasında bunlar həyata keçirilə bilər”.