“Azərbaycan Respublikasının Prezidenti cənab İlham Əliyev tərəfindən 2024-cü ilin “Yaşıl Dünya Naminə Həmrəylik İli” elan edilməsi çox önəmli bir qərar idi”. Bu barədə açıqlamasında Milli Məclisin deputatı Naqif Həmzəyev deyib.
Onun sözlərinə görə, hazırda dünyada iqlim dəyişiklikləri, xüsusilə də gələcəklə bağlı problemlər və onların həlləri istiqamətində dünyanın həmrəylik nümayiş etdirməsi çox vacibdir: “Azərbaycan ötən dövr ərzində iqlim dəyişikliklərinə, hava çirklənməsinin qarşısının alınmasına, yaşıllıq massivlərinin salınmasına, kökü kəsilməkdə olan heyvanlar və bitkilərin qorunması ilə bağlı xüsusi qoruq ərazilərinin yaradılmasına yaxud mövcud qoruqların şəraitlərinin yaxşılaşdırılmasına önəm verib. Xüsusilə də COP-28-də Azərbaycanın aktiv iştirakı və dünya dövlətlərinin əksəriyyəti tərəfindən COP-29-un Azərbaycanda keçirilməsinə razılığın verilməsi düşünürəm ki, Azərbaycanın növbəti qələbəsi kimi qəbul edilməlidir”.
Deputat qeyd edib ki, Azərbaycan enerji ölkəsi olmasına baxmayaraq dövlətimizə bu cür etibarın edilməsi, güvən nümayiş etdirilməsi Prezident İlham Əliyevin və Azərbaycan dövlətinin uğuru kimi qələmə verilməlidir: “Azərbaycan klassik enerji nəql edən ölkə olması ilə yanaşı eyni zamanda “Yaşıl Enerji”yə önəm verən, istehsalını artırmaqda maraqlı olan və bununla bağlı çoxlu investisiya cəlb edən, Qarabağı o cümlədən Azərbaycanın digər ərazilərinin potensialını düzgün dəyərləndirərək “Yaşıl Enerji”nin istehsalına başlayan bir ölkədir”.
N.Həmzəyev sonda qeyd edib ki, Azərbaycan yaxın gələcəkdə bu sahədə çox böyük uğurlara imza ata, enerjisinin ən azı 30%-nin alternativ enerji olması öhdəliklərini uğurla yerinə yetirə, dayanıqlı inkişafla bağlı bütün öhdəlikləri həyata keçirə biləcək: “Yaxın gələcəkdə Azərbaycan Avropa və region üçün yaşıl enerji resurslarını ötürə bilən dövlət statusuna gəlib çatacaqdır. Eyni zamanda 2024-cü ildə yaşıl dünya naminə həmrəylik nümayiş etdirən Azərbaycan dövləti və Azərbaycanlılar dünya dövlətlərini bu önəmli missiya ətrafında birləşdirməyə nail olacaqdır”.