"Birləşmiş Ərəb Əmirlikləri ilə Azərbaycan arasında münasibətlər getdikcə daha da inkişaf etməkdədir". Bu sözləri açıqlamasında deputat Naqif Həmzəyev deyib.
Onun sözlərinə görə, Azərbaycanda, xüsusilə, COP29-un keçirilməsi, bundan əvvəl beynəlxalq forumun BƏƏ-də baş tutması, müzakirə olunan məsələlərin davamı olaraq Azərbaycanda keçirilməsi, əlaqələrin yüksək səviyyədə olmasının bariz nümunəsidir: "Azərbaycana sərmayə qoyan dövlətlər sırasında Birləşmiş Ərəb Əmirlikləri də ön sıradadır. Azərbaycanda alternativ enerji mənbələrinin işlənməsi, istehsal edilməsi sahəsində BƏƏ tərəfindən investisiya qoyulur. Həm külək enerjisi, yaşıl enerji, günəş enerjisi ilə bağlı bir çox layihələr həyata keçirilir. Birgə investisiya fondunun yaradılması da BƏƏ-nin əldə etdiyi təcrübənin yaxın gələcəkdə Azərbaycanda da tətbiq edilərək iqtisadiyyatın gücləndirilməsinə xidmət edir. İkitərəfli münasibətlərin inkişaf etdirilməsi hər iki xalqın rifahının yaxşılaşdırılmasına və münasibətlərimizin daha da inkişafına böyük töhfədir. Qarşılıqlı səfərlər, sərmayələrin qoyulması, birgə layihələrin keçirilməsi həm dövlətlərimizin, həm də iqtisadiyyatımızın güclənməsinə zəmin yaradır".
"BƏƏ-nin prezidentinin Azərbaycana baş tutan rəsmi səfəri də münasibətlərin inkişafına böyük töhfə olacaq. Biz 2024-cü ildən iki dövlət arasında əlaqələrin ən yüksək səviyyəyə çatdırılması üçün hökumətlərarası komissiyaların və aidiyyəti qurumların birgə çalışaraq prezidentlər tərəfindən nəzərdə tutulan öhdəliklərin yerinə yetirilməsinə və əlaqələrin yüksəldilməsinə nail olacağımıza ümid edirik"- deyə deputat bildirib.