Parlamentin bu gün keçirilən iclasında ordu ilə bağlı məlumatları, eləcə də şəxsi heyət və texnikanın yerdəyişməsini, hərəkət istiqamətini və s. yayan, bu məsələdə rəsmi informasiyalara deyil, qeyri-rəsmi mənbələrə istinadən edən şəxslərin cinayət məsuliyyətinə cəlb edilməsinə qərar verilib.
Mövzu ilə bağlı açıqlama verən millət vəkili Naqif Həmzəyev qanundakı bu yeniliklərin mühüm əhəmiyyətə malik olduğunu bildirib:
“Biz dəfələrlə hərbi əməliyyatlar və təlimlər zamanı sosial şəbəkələrdə, bəzi mətbuat orqanlarında rəsmi qurumlar tərəfindən ictimailəşdirilməyən informasiyaların yayılmasına şahid olduq. Ordumuzun canlı qüvvəsi və texnikasının yerdəyişməsi ilə bağlı məlumatların bilərəkdən və ya bilməyərdən sızdırılması arzuedilməz və təhlükəli hal idi. Bunun qarşısının alınması üçün lazımi tədbirlər görülsə də, qanunvericilikdə bu sahədə müəyyən boşluqlar var idi.
Qanunvericiliyə edilən bu dəyişiklik ilk növbədə məxfi məlumatlarn, hərbi sirrin qorunmasına xidmət edir.
İkincisi, sözügedən yeniliklər vətəndaşları sövq edir ki, onlar bu məsələdə daha məsuliyyətli olsunlar. Ümumiyyətlə, qanunvericilikdəki bu dəyişiklik hər bir vətəndaşın məsuliyyətini artırır. Hər kəs qulağına sırğa etmiş olacaq ki, rəsmi mənbənin təqdim etmədiyi hər hansı bir məlumatı yaymaq qadağandır və bunun hüquqi məsuliyyəti var.
Hesab edirəm ki, bu qanunlar hərbi sirr və informasiyaların daha etibarlı şəkildə qorunmasına kömək edəcək”.