Oktyabrın 8-də Azərbaycan Prezidenti İlham Əliyev Gürcüstana səfər edib. Səfər zamanı İlham Əliyev bu ölkənin Baş naziri İrakli Qaribaşvili ilə təkbətək görüşüb, iki ölkə arasındakı əlaqələrin gələcək perspektivlətindən bəhs olunub.
Prezidentin səfərində əsas məqamlar nələr olub?
Məsələ ilə bağlı danışan Milli Məclisin Azərbaycan-Gürcüstan Parlamentlərarası İşçi Qrupunun sədri Arzu Nağıyev Prezident İlham Əliyevin Ulu öndər Heydər Əliyevin Gürcüstanla bağlı siyasətini davam etdirdiyini vurğulayıb:
"30 il ərzində Gürcüstan-Azərbaycan əlaqələri dinamik inkişafla yadda qalıb. Ulu öndər Heydər Əliyev hakimiyyətdə olanda onunla Gürcüstanın ilk Prezidenti Eduard Şevardnadze arasındakı şəxsi əlaqələrdən də çox şey asılı idi. Liderlərarası əlaqələr yüksək səviyyədə idi.
Müstəqillik illərinin ilk dövrlərində Gürcüstan və Azərbaycanda vəziyyət gərgin idi. Buna baxmayaraq, hər iki lider Azərbaycan və Gürcüstanın tərəfdaş və dost olduğunu nümayiş etdiridi. Ölkələrimiz arasında böyük makroiqtisadi layihələr imzalandı. Bu da əlaqələrin tarixi olduğunu göstərir.
Ölkələrimiz arasında əsas məsələlərdən biri Gürcüstanda xeyli sayda azərbaycanlının 5 rayonda kompakt şəkildə yaşaması ilə bağlıdır. Bunun özü də qarşılıqlı münasibətlərin yaranmasında böyük rol oynayıb. Hazırda ənənə davam edir. Cənab Prezident İlham Əliyevin səfəri onun yürütdüyü siyasətin Ümumilli lider Heydər Əliyevin siyasi xətti ilə hər cəhətdən üst-üstə düşdüyünü göstərdi".
İşçi Qrupunun sədri iki ölkə arasındakı iqtisadi əlaqələrin yeni fazada olduğunu söyləyib:
"Bakı-Tblisi-Qars dəmiryolunun və Bakı-Tblisi-Ceyhan neft kəmərinin çəkilməsi iki ökə arasındakı iqtisadi əlaqələrin necə yüksək səviyyədə olmasından xəbər verən əsas məqamlardandır. Vaxtilə Azərbaycan neftinin Avropaya nəqlinə inanmayanlar həddən artıq çox idi. Lakin bu layihələr reallaşdı. Bunda Ümumilli lider Heydər Əliyevin rolu danılmazdır. Eduard Şevardnadzenin bu istiqamətdə atdığı addımlar da öz bəhrəsini verdi.
Bakı-Tblisi-Ceyhan kəmərinin işə düşməsi dünyada daha böyük inam yaratdı. Buna görə də həmin layihə Ulu öndərin şah əsərlərindən biridir.
Hazırda ən mühüm istiqamətlərdən digəri daşınmalarla bağlıdır. İsər Batumi limanından Azərbaycana - buradan da Ələt limanı vasitəsilə Qazaxıstana və əksinə Azərbayacan vasitəsilə Gürcüstanın Batumi limanına daşınmalar ən mühüm əhəmiyyət kəsb edən istiqamətdir. Bundan başqa, indi Gürcüstanda Kulebi limanı fəaliyyət göstərir. Azərbaycan və Qazaxıstan neftinin daşınmasında bu limanın da böyük rolu var. Cənab Prezident vurğuladı ki, Azərbaycan Anaki limanının tikilməsində də maraqlıdır. Birmənalı olaraq "Orta dəhliz" vasitəsilə daşınmalar həm Azərbaycana, həm də Gürcüstana xeyir gətirir. Bu gün loqistika və daşınmalar istiqamətində iki dövlət arasındakı münasibət bütün dünyada yeni nailiyyətlərin əldə edilməsi deməkdir. Tək Gürcüstan və Azərbaycan deyil, eyni zamanda beynəlxalq və regional dövlətlərdən də dvident götürənlər var".
Deputat Azərbaycan və Gürcüstan parlamentləri arasındakı dostluq qrupunun gördüyü işlərdən də bəhs edib:
"Zənnimcə, parlamentlərarası münasibətlər müsbət dəyərləndirilir. Bunun da səbəbi Azərbaycan və Gürcüstan parlamentlərinin rəhbərləri arasında olan münasibətlərdir. Sahibə xanım Qafarovanın Gürcüstana, eləcə də bu ölkənin parlament sədrinin Azərbaycana səfəri kimi amillər mühüm əhəmiyyət kəsb edir. Tək qruplar arasında deyil, komitələr arasındakı əlaqələr də inkişaf etdirilməlidir. Bir müddət əvvəl Gürcüstan parlamentlərinin Mədəniyyət komitəsinin Azərbaycana səfəri oldu. İki ölkənin Mədəniyyət komitələri arasında dostluq memarandumu imzalandı. Bundan savayı, seçkilərdə müşahidəçi qismdə iştirak haqqında razılığa gəlinib. Azərbaycanlılar yaşayan 5 rayona səfərlərin təşkil edilməsi, həm də təhsil sahəsində parlamnetlərarası işçi qrupu da öz töhfəsini verməkdədir. Gürcüstan-Azərbaycan Parlamentlərarası İşçi Qrupunun rəhbəri qonşu ölkənin palament spikerinin müavinidir. Bu da mühüm əhəmiyyət kəsb edir".
Azərbaycan-Gürcüstan Parlamentlərarası İşçi Qrupunun üzvü Naqif Həmzəyev söyləyib ki, iki ölkə arasında əlaqələrin yüksək səviyyədə qurulması Ümumilli lider Heydər Əliyevin adı ilə bağlıdır:
"Azərbaycan Respublikasının Prezidenti İlham Əliyev Gürcüstandakı çıxışında Heydər Əliyev və Eduard Şvardnadzenin dost oluqlarını xatırlatdı. Cənab Prezident vurğuladı ki, məhz iki lider dostluqları sayəsində birgəyaşayış, əməkdaşlıq əlaqələrinini gücləndirilməsi kimi məsələlərin öhdəsindən gəlmişdilər. Məhz bu iki dahi şəxsin əsasını qoyduğu Gürcüstan-Azərbaycan əlaqələri bizim tərəfimizdən uğurla davam etdirilir.
İki ölkə arasında çox böyük layihələr həyata keçirilib. Azərbaycan demək olar ki, özünün bütün enerji resurslarını Gürcüstan vasitəsilə Türkiyə və Qara dənizə çıxarır. Azərbaycan həm enerji, həm də loqistika xidməti göstərən ölkə kimi Gürcüstanla yaxından əməkdaşlıq edir".
Deputat vurğulayıb ki, iki ölkə yeni layihələr üzərində düşünülür:
"Xüsusilə də, Azərbaycan yükdaşıma qabiliyyətinin artırılmasında maraqlıdır. Bu məqsədlə Bakı-Tbilisi dəmiryolu xəttinin ötürmə qabiliyyətinin 5 dəfə artırılması nəzərdə tutulur. Eyni zamanda, Azərbaycan Gürcüstandakı yeni limanların işlənməsində yaxından iştirak etmək, sərmayə qoymaqda maraqlıdır. Bakı Gürcüstan limanlarının qabiliyyətinin artırılmasında da yaxından iştirak etmək istəyir. Azərbayan yalnız enerji resurslarının Gürcüstan vasitəsilə daşınmasında yox, həmçinin yükdaşıma qabiliyyətinin artırılmasında maraqlıdır. Nəticədə həm Azərbaycan, həm də Gürcüstan enerji resurslarının ötürülməsindən daha çox gəlir əldə edəcək. Azərbaycan alternativ enerji mənbələrinin işlənməsində, "Yaşıl enerji dəhlizi"nin işə salınmasında maraqlıdır. Artıq bu məsələdə Azərbaycan avropalı həmkarları ilə razılaşıb. Gürcüstan bu məsələdə Azərbaycanla yaxından əməkdaşlıq edəcək. Qara dəniz vasitəsilə "Yaşıl enerji dəhlizi" reallaşdırılacaq. Bununla da, "yaşıl enerji"nin Gürcüstana, oradan da Qara dəniz vasitəsilə Avropaya ötürülməsi mümkün olacaq".
Naqif Həmzəyev deyib ki, Azərbaycanın əsas istəyi Cənubi Qafqazda sülhün bərqərar olması və bu istiqamətdə Gürcüstanın bizi dəstəkləməsidir:
"Cənubi Qafqaz ailəsinin formalaşdırılması və sülhün təmin edilməsi məqsədilə Cənubi Qafqaz liderlərinin Tiflis görüşünün şahidi ola biləcəyik. Ermənistan əlaqələrin normallaşmasına səmimi yanaşsa, Tiflisdə görüşlər keçiriləcək və razılaşmalar əldə olunacaq. Bir sözlə, Azərbaycan və Gürcüstan münasibətləri nümunədir. Biz ümid edək ki, Ermənistan da Azərbaycan-Gürcüstan münasibətlərindən doğru-dürüst nəticə çıxararaq, sülhün əldə olunmasına öz töhfəsini verəcək.
Azərbaycan və Gürcüstanla yaxından əməkdaşlıq etməklə beynəlxalq layihələrdə iştirak edəcək. Ermənistan da öz iqtisadiyyatının inkişafında Azərbaycan və Gürcüstanın potensialından istifadə edə biləcək. Gürcüstana növbəti səfər gələcək uğurlarımız üçün addımdır. Biz inanırıq ki, Azərbaycan-Gürcüstan əlaqələri daha da inkişaf edəcək. Nəticədə bu münasibətlər xalqlarımızın rifahının artırılmasına və iqtisadi potensialımızın gücləndirilməsinə yaxşı xidmət etmiş olacaq".