Xəbər verildiyi kimi, oktyabrın 5-də İspaniyanın Qranada şəhərində Avropa Siyasi Birliyinin sammiti keçiriləcək. Sammit çərçivəsində Azərbaycan və Ermənistanın iştriakı ilə beştərəfli görüşün keçirilməsi nəzərdə tutmalı idi.
Azərbaycan görüşdə Türkiyənin iştirakını təklif etmişdi və bunda israr edirdi. Lakin buna imkan verilməyib, bu məsələdə Fransa və Almaniya xüsusi canfəşanlıq nümayiş etdirib.
Azərbaycana təklif olunan beşli formatda (Ermənistan-Azərbaycan-Fransa-Almaniya-Avropa İttifaqı) anti-Azərbaycan ab-havası formalaşıb. Buna görə Azərbaycan bu görüşdən imtina edib və Prezident İlham Əliyev Qranadaya getməyib.
Siyasi analtiklərin sözlərinə görə, Azərbaycan bütün ərazilərində suverenliyini bərpa edib və Qarabağda qayda-qanun yaradır.
Xatırladaq ki, oktyabrın 2-də Prezident Administrasiyası Qarabağın erməni sakinlərinin reinteqrasiyası ilə bağlı şərtləri açıqlayıb.
Qeyd edilib ki, reinteqrasiya Azərbaycan Respublikasının ərazi bütövlüyü və suverenliyi çərçivəsində Azərbaycan Respublikasının Konstitusiyası, qanunları və beynəlxalq öhdəlikləri əsasında həyata keçirilir.
Məsələ ilə bağlı açıqlama verən Milli Məclisin deputatı, Parlamentlərarası İttifaqın üzvü Naqif Həmzəyev bildirib ki, Azərbaycan bu günə qədər verdiyi bütün sözləri yerinə yetirib və regionda uzunmüddətli və dayanıqlı sülhün əldə olunması üçün bütün mümkün vasitələrini səfərbər edir.
"2023-cü ilin sentyabrın 19-da baş tutan lokal antiterror tədbirlərinin nəticəsi olaraq separatçılar təslim oldular, qanunsuz erməni silahlı birləşmələri bu ərazilərdən çıxarıldı, silah-sursat Azərbaycan tərəfinə təhvil verildi. Azərbaycan ərazilərində yaşamaq istəyən, Azərbaycan vətəndaşlığını qəbul edən erməni sakinlər də burada öz həyatlarını davam etdirirlər. Xocalıda, Yevlaxda Azərbaycan nümayəndə heyəti ilə erməni sakinlərinin nümayəndələri arasında görüş keçirilib. Azərbaycan tərəfinin reinteqrasiya ilə bağlı proqramları onlara təqdim edilib və bu proqramdan irəli gələn bütün müddəalar mərhələli şəkildə həyata keçirilir. Xüsusi vebsayt formalaşdırılıb, vebsayt vasitəsilə erməni sakinlər müraciət edərək Azərbaycan vətəndaşlığına keçmək niyyətində olduqlarını bildirə bilərlər”, -deyə N.Həmzəyev bildirib.
Deputat qeyd edib ki, Azərbaycan polisi Qarabağda ermənilərin yaşadığı ərazilərdə təhlükəsizliyi təmin edir və Azərbaycan ordusu bütün bu ərazilərdə möhkəmlənib: “Demək olar ki, mümkün təhlükələri də aradan qaldırırlar. Minalanmış əraziləri təmizləyirlər, hansısa təxribatlarının yaranmasının qarşısını alırlar.
Eyni zamanda, bu ərazilərdə Azərbaycan vətəndaşlığını qəbul edəcək bütün erməni sakinlərə də bir çox hüquqlar tanınacaqdır. İlk növbədə həmin vətəndaşların erməni dilindən istifadəsinə imkan yaradılacaqdır, bu ərazilərdə ASAN və DOST xidmətlərini quracaq və həmin vətəndaşlar da bu xidmətlərdən yararlana biləcəklər. Bütün bunlarla yanaşı bu vətəndaşlar həm prezidentin xüsusi nümayəndəliyinə, həmçinin daxili işlər orqanlarına da işə cəlb olunacaqlar. Bu da onların məşğulluğunun təmin edilməsi üçün əla fürsətdir. Bunlarla yanaşı buradakı erməni sakinlərə həm əməyin ödənişi, eyni zamanda sosial ödənişlər sistemi ilə bağlı da bütün qaydalar şamil olunacaqdır və bu sakinlər üçün yaşadıqları ərazilərdə Azərbaycan manatının istifadəsi təmin ediləcəkdir, eyni zamanda bələdiyyə seçkiləri zamanı bələdiyyə seçkilərində iştirak edəcəklər, bu bələdiyyələrin üzvlüyündə ermənilər də təmsil olunacaqlar. Həmin erməni sakinlərin də sahibkarlıq fəaliyyəti ilə məşğul olması üçün də şərait yaradılacaq. Bir sözlə Azərbaycan vətəndaşlarına şamil olunan hüquqlar məhz erməni vətəndaşları üçün də yaradılır.
Düşünürəm ki, bu Azərbaycan tərəfinin növbəti humanist bir addımıdır. Azərbaycan prezidenti İlham Əliyevin bu günə kimi söylədiyi bütün fikirlər, bütün sözlər həmişə reallaşıb və ermənilərə verilmiş sözlər də artıq reallaşdırılır. Erməni sakinləri üçün hər cür şərait yaradılır. Azərbaycan humanitar hüquq qaydaları çərçivəsində bütün addımları həyata keçirir”.
N.Həməyev bildirib ki, Birləşmiş Millətlər Təşkilatının da xüsusi missiyası bu ərazilərdə olub və real vəziyyətlə tanış olublar: “Dinc vətəndaşlarla, dinc sakinlərlə Azərbaycan ordusunun heç vaxt işi olmayıb, bu proseslər zamanı bir nəfər belə dinc sakinin yeni qanamadı. Biz hətta Azərbaycan ərazilərini tərk edərək Ermənistana getmək niyyətində olan mülki ermənilərin ərzaqla, lazımi gigyenik vasitələrlə təmin edilməsini həyata keçirdik. Xüsusi videokadrlardan da görürük ki, onlara insani münasibət bəslənilir və bu, birbaşa onu deməyə imkan verir ki, Azərbaycan beynəlxalq hüquq və konvensiyalara əməl edir və humanitar qaydalara bu günə kimi bu ərazilərdə tam əməl olunub, bu gündən sonra da bu işlər həyata keçiriləcəkdir. İnanırıq ki, Azərbaycanın birgə yaşayış üçün atdığı bu addımlar, bu səylər, Ermənistan tərəfindən də müsbət dəyərləndiriləcəkdir və erməni sakinlər bu münasibəti doğru, düzgün dəyərləndirərək xoşbəxt həyat yaşamaq üçün bu ərazilərdə qalaraq yaşayışlarına davam edəcəklər”.