“Bu günə qədər müxtəlif platformalarda Azərbaycan və Ermənistan rəhbərlərinin görüşləri olub. Rəsmi Bakı ilk gündən öz şərtlərini səsləndirib və təqdim etdiyi 5 baza prinsipi əsasında bu danışıqların gündəliyi formalaşdırılıb, 70%-ə yaxın maddələr razılaşdırılıb. Lakin mübahisəli maddələr də mövcuddur”.
Bunu açıqlamasında Milli Məclisin deputatı Naqif Həmzəyev bildirib.
Onun sözlərinə görə, lokal antiterror əməliyyatından sonra Ermənistanın sərgilədiyi mövqe rəsmi İrəvanın sülh üçün real töhfələr verə biləcəyinə ümid yaradır:
“Ermənistan öz öhdəliklərini yerinə yetirmədiyi üçün Azərbaycan lokal antiterror əməliyyatlarına başladı. Üçtərəfli bəyanatda qanunsuz erməni silahlılarının ərazilərimizi tərk etməsi ilə bağlı maddə olsa da bu proses reallaşmadı. Növbəti görüş zamanı delimitasiya, demarkasiya məsələləri də gündəmə gətiriləcək. Ermənistanın danışıqlarda səmimi olacağı, öz töhfəsini verəcəyinə ümid edirik. Belə olacağı təqdirdə bu danışıqlardan real nəticə əldə edə bilərik. İki tərəf də sülhün əldə olunması üçün əməli addımlar atmalıdır. Azərbaycan bu günə qədər həmin istiqamətdə öz töhfəsini verib. Lakin tez-tez görürük ki, sülh prosesi yaxınlaşan zaman Ermənistan təxribatlara əl atıb. Bunu nəzərə almaq lazımdır”.