"Azərbaycan dövləti tərəfindən regionların inkişaf etdirilməsi ilə əlaqədar xüsusi proqramlar həyata keçirilib. Demək olar ki, bizim əksər rayon və şəhərlərimizdə müasir infrastruktur yaradılıb. Hal-hazırda da bu işlər davam etdirilməkdədir. Ancaq təəssüflər olsun ki, gənclərin böyük əksəriyyəti Bakı şəhərinə üz tuturlar. Bakıdan da bir çox gənclərimiz fərqli şəhərlərə və ölkələrə yollanır. Əslində dünyanın hər bir yerində bu proses var və normaldır. Amma rayon yerlərindən Bakıya sürətli şəkildə gənclərin köçməsinin qarşısını almaq üçün ilk növbədə paytaxtdan kənarda olan rayon və şəhərlərdə iş yerlərinin sayının artrılması məqsədilə müxtəlif layihələr həyata keçirilməlidir". Bu sözləri açıqlamasında deputat Naqif Həmzəyev deyib.
Onun sözlərinə görə, ilk növbədə sahibkarlığın inkişaf etdirilməsi üçün vergi güzəştləri tətbiq edilməlidir: "Paytaxtdan kənarda olan ərazilərdə daha cəlbedici kreditlər verilməlidir. Gənclər də belə olduğu təqdirdə paytaxtdan kənarda qalıb yaşamaq istəyərlər. Bu onlar üçün əla fürsət olardı. Bununla yanaşı biz paytaxtdan kənar olan ərazilərdə də sosial həyatı daha yaxşı formada təşkil etməliyik. Bacardığımız qədər çalışmalıyıq ki, gənclərin asudə vaxtlarını səmərəli keçirməsi üçün lazımi şəraiti qura bilək".
Deputat sözlərinə belə davam edib: "Həmçinin, universitetlərin paytaxtdan kənara köçürülməsinin də bu prosesə çox böyük töhfə verə biləcəyini düşünürəm. Çünki əgər yüksək imkanlara malik universitetlər digər rayon və şəhərlərdə olsa, gənclər də ora üz tutacaq.
Bütün bunlarla yanaşı çalışmalıyıq ki, gənc alimlərimizin də paytaxtdan kənarda yaşamasına şərait yaradaq. İlk öncə onların mənzil şəraitinin yaxşılaşdırılması üçün müəyyən güzəştlər tətbiq edilməlidir. Əgər biz ipotekaların verilməsində universitetlərdə deyil, orta məktəblərdə çalışan müəllimlər üçün müəyyən güzəştlərin olduğunu görürdüksə, sırf universitetdə işləyən, elmi dərəcəsi olmayan gənclər üçün bu güzəştlərin olmadığı faktı ilə rastlaşdıq. Düşünürəm ki, ipotekanın verilməsində də müəyyən yumşaldılmalar və güzəştlər edilsə, gənc ailələr paytaxtdan kənarda öz həyatlarını qurub davam edərlər. Bir sözlə biz paytaxtda gənclər üçün yaradılan güzəşt və şəraitlə paytaxtdan kənarda olan arasında fərqlər yaratmalıyıq ki, onlar üçün burada yaşamaq daha cəlbedici olsun. Əgər bunları etsək, gənclərin Bakıya sürətli köçünün qarşısını almış olarıq".