“Azərbaycan qalib ölkə olmasına baxmayaraq, Ermənistanla sülh müqaviləsinin imzalanması üçün bütün mümkün alətləri səfərbər edib”.
Bunu deputat Naqif Həmzəyev deyib. Onun sözlərinə görə, sülhün əldə olunmasına ən çox töhfə verən Azərbaycandır.
“Təəssüf ki, üç ildə danışıqlar prosesində müəyyən razılıqlar əldə olunsa da, Ermənistan tərəfi müxtəlif təxribatlar törədib. Bununla da danışıqlar prosesinə kölgə salıb. Sülh danışıqları prosesi nə qədər gərgin keçsə də, rəsmi açıqlamalara görə sülh anlaşmasının artıq əsas hissəsi razılaşdırılıb”, - o bildirib.
Millət vəkilinin fikrincə, İspaniyanın Qranada şəhərindəki növbəti görüş zamanı hələ də razılaşdırılmayan məqamlar ətrafında müzakirələr aparılacaq: “Xüsusilə, Azərbaycanın suverenliyini tam olaraq bərpa etməsi, erməni sakinlərlə birgə yaşayışın mümkünlüyü üçün reinteqrasiya fəaliyyətinin gücləndirilməsi imkan verəcək ki, Ermənistan öhdəliklərini yerinə yetirsin. İlk növbədə Zəngəzur dəhlizinin açılması, Ermənistanla kommunikasiya xətlərinin işə düşməsi, sərhədlərin delimitasiya-demarkasiyası məsələləri həll olunmalıdır. Bu sadalananlar olmadan yalnız sülh razılaşması və ya sazişinin imzalanma ehtimalı da var. Azərbaycan və Ermənistanın bir-birinə qarşı ərazi iddialarının olmamasına, sülhə sadiq qalmalarına dair daha bir sənədin imzalanması mümkündür”.
Deputat deyir ki, bu, uzun zaman tələb edən prosesdir: “Daha sonra danışıqlarda Zəngəzur dəhlizində dəmiryol xəttinin işə düşməsi, xəttin Ermənistan ərazisindəki hissəsinin tikintisi razılaşdırıla bilər. Bununla yanaşı, Ermənistanla digər kommunikasiyaların da mərhələli formada açılması real görünür”.