Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi;
Vətən, torpaq sevgisi, ictimai məsuliyyət hissi və digər maraq doğuran mövzular ətrafında söhbətlər aparılacaq
Bu cür görüşlərin şagirdlərin vətənpərvər ruhda yetişdirilməsində çox böyük faydası olur
“Məktəbdə...” layihəsinin yeni dərs ilində ilk görüşü keçiriləcək. Bakı Şəhəri üzrə Təhsil İdarəsindən verilən məlumata görə, görüş sentyabrın 26-da paytaxtdakı 300 nömrəli tam orta məktəbdə baş tutacaq. Bakı Şəhəri üzrə Təhsil İdarəsi tərəfindən reallaşdırılan layihənin budəfəki qonağı Vətən Müharibəsi Qəhrəmanı, polkovnik-leytenant Anar Mirzəyev olacaq. Görüşdə məktəb və müəllimin insanların formalaşdırılmasında rolu, vətənpərvərlik hisslərinin aşılanmasında məktəbin üzərinə düşən vəzifələr, yeniyetmə və gənclərdə Vətən, torpaq sevgisi, ictimai məsuliyyət hissi və digər maraq doğuran mövzular ətrafında söhbətlər aparılacaq, məktəbliləri düşündürən suallara aydınlıq gətiriləcək. Təhsil üzrə ekspert Hikmət Əlizadə deyib ki, məktəblərdə hərbi vətənpərvərlik tərbiyəsi ilə bağlı mövzulara geniş yer verilməlidir. Onun sözlərinə görə, ümumiyyətlə, gənclərin bu istiqamətdə maarifləndirilməsi, bilik və savadlarının artırılması başlıca məqsədlərdən olmalıdır: "Dərsliklərdə bölmələrin sayı artırılsa, müsbət nəticələr olar. Xüsusilə də, ədəbiyyat və tarix dərsliklərində vətənpərvərlik xüsusi proqram üzrə keçirilməlidir. Düşünürəm ki, ədəbiyyat və tarix dərsliklərində həm 44 günlük Vətən müharibəsi, həm də 23 saat 44 dəqiqə çəkən antiterror tədbirləri ilə bağlı geniş və əhatəli proqram əksini tapmalıdır. Azərbaycan dövləti elə bir coğrafi ərazidə yerləşir ki, hər zaman ölkəmizə qarşı kənar təhdidlər ola bilər. Bu baxımdan, ordumuz daim güclü olmalı, gənclərimiz vətənpərvərlik ruhunda yetişməlidir”.
Ümumən, qeyd etmək lazımdır ki, indiyə qədər aparılan dövlət gənclər siyasətinin mərkəzində müasir dünyanın çağırışlarına cavab verən, hazırlıqlı, savadlı, eyni zamanda milli-mənəvi dəyərlərə bağlı vətənpərvər nəsil yetişdirmək prinsipi dayanıb. Bu gün tam əminliklə deyə bilərik ki, həyata keçirilən dövlət gənclər siyasəti özünün müsbət nəticələrini göstərməkdədir. Xüsusən, Vətən müharibəsi dövründə Azərbaycan gəncliyinin böyük rəşadətinə şahidlik etdik. Bu, özünü həm ön, həm də arxa cəbhədə göstərdi. Gənclik öz vətənpərvərliyini ön cəbhədə əlisilahlı əsgər kimi, arxa cəbhədə isə informasiya müharibəsinin döyüşçüsü kimi göstərdi. Bir çox hallarda ictimaiyyətin bir sıra nümayəndələrinin gileyləndiyi, gələcəyi ilə bağlı bədbin proqnozlar verdiyi Azərbaycan gəncliyi bütün bunların tam əksini sübut etdi. Gəncliyimiz göstərdi ki, o, bu müddət ərzində öz dövlətinə, millətinə sadiq vətənpərvər gənc kimi formalaşıb. Müharibə bitmiş olsa da, düşmənin informasiya cəbhəsində, hətta hərbi müstəvidə təxribatları bitmir. Şübhəsiz, belə bir şəraitdə ölkə gəncliyi hər zamankından daha ayıq-sayıq, vətənpərvər və diqqətli olmalıdır. Bu, çox önəmlidir. Ona görə də gənclərin vətənpərvərlik tərbiyəsi, onlara Vətənə, xalqa məhəbbət hisslərinin aşılanması həmişə olduğu kimi, bu gün də aktualdır. Təsadüfi deyil ki, Ümummilli Lider Heydər Əliyev gənc nəslin vətənpərvərlik ruhunda tərbiyə olunmasını gənclərin tərbiyəsinə cavabdehlik daşıyan bütün qurumların, xüsusilə də, təhsil işçilərinin qarşısında ən mühüm vəzifə kimi qoyub. Müxtəlif səviyyəli tədbirlərdə, gənclərlə, müəllimlərlə, ziyalılarla çoxsaylı görüşlərində bu məsələyə dönə-dönə toxunaraq öz müdrik məsləhət, tövsiyə və tapşırıqlarını verib. Ulu Öndər hələ 1994-cü ildə Bakı şəhərinin təhsil işçiləri ilə görüşündəki nitqində gənclərin vətənpərvərlik tərbiyəsinin zəruriliyinə toxunaraq deyib: "Müstəqil dövlətdə yaşayan hər bir vətəndaş birinci növbədə bu dövlətin müstəqilliyinin, suverenliyinin təmin olunmasını öz həyatının əsas vəzifəsi və məqsədi bilməlidir. Ona görə də bizim gənclər, təhsil alan gənclər gərək məktəblərdə ilk addımlarından vətənpərvərlik əhvali-ruhiyyəsi ilə tərbiyə olunsun. Bütün dərslər, xüsusən, humanitar fənlər gərək gənclərimizə Vətənə sədaqət, vətənpərvərlik ruhu aşılasın, tərbiyə etsin və bunlar hər bir gəncin qəlbində sarsılmaz bir qalaya çevrilsin...". Heydər Əliyevin müəyyənləşdirdiyi siyasi xətti uğurla davam etdirən ölkə Prezidenti İlham Əliyev də çoxsaylı çıxışlarında gənclərin vətənpərvərlik ruhunda tərbiyə olunmasının vacibliyini dönə-dönə vurğulayıb. Bu işin Azərbaycan dövlətinin gənclər, təhsil siyasətinin prioritet məsələlərindən olduğunu diqqətə çatdıraraq bildirib: "Biz böyüməkdə olan nəslin vətənpərvərlik ruhunda, milli-mənəvi dəyərlərimiz ruhunda tərbiyə edilməsinə çox böyük əhəmiyyət veririk. Bu bizim inkişafımızın əsası, hər bir xalqın inkişafının əsasıdır". Ölkə başçısının tapşırıq və tövsiyələrini əldə rəhbər tutan təhsil müəssisələri, eləcə də əsas fəaliyyəti gənclərlə işi olan digər qurumlar vətənpərvərlik hissinin gənclərə aşılanmasına böyük diqqət yetirirlər. Orta məktəblərdə, eləcə də təhsilin digər pillələrində tədris olunan humanitar fənlər, xüsusən də ədəbiyyatın, tarixin potensialı daha böyükdür. Bu fənlərin tədrisi şagirdləri, tələbələri müvafiq biliklərlə silahlandırdığı kimi onların vətənpərvərlik ruhunda tərbiyəsinə də güclü təsir göstərir, gənclərdə milli mənlik şüuru formalaşdırır. Gənclərlə aparılan vətənpərvərlik tərbiyəsi işinin mühüm istiqamətlərindən birini də ayrı-ayrı şəxsiyyətlərin, milli qəhrəmanların şəxsi nümunələrindən istifadədir. Böyük pedaqoqlar, tərbiyə nəzəriyyəçiləri tərbiyədə şəxsi nümunənin rolunu həmişə yüksək dəyərləndirib, onun böyük təsir gücünə malik olduğunu vurğulayıblar. Məhz buna görə də şəxsi nümunə əsasında tərbiyə işi praktikada həmişə geniş yer tutub. Tariximizdə, müasir dövrümüzdə həyatı gənclərə vətənpərvərlik nümunəsi olan şəxsiyyətlər çoxdur.
Millət vəkili Naqif Həmzəyev açıqlamasında deyib ki, müxtəlif layihələr formasında, eyni zamanda orta məktəblərdə Vətən Müharibəsi qəhrəmanlarının, qazilərin, o cümlədən şəhid ailələrinin üzvlərinin şagirdlərlə görüşləri ənənəyə çevrilib. Deputat vurğulayıb ki, bu cür görüşlərin şagirdlərin vətənpərvər ruhda yetişdirilməsində çox böyük faydası olur:
"Eyni zamanda şəhidlərimizin təhsil aldığı orta məktəblərdə qəhrəmanların adına siniflər yaradılır. Bu ənənə ali təhsil ocaqlarında da formalaşıb. Bu da yeniyetmələrimizə imkan verir ki, onlar Vətən uğrunda canından keçmiş şəhidlərimizi, yaralanmış qazilərimizi, igidlərimizi daha yaxından tanısınlar, vətənpərvər ruhda böyüsünlər. Onların Vətən sevgisinin gənclərimizə aşılanmasına çox böyük töhfələri olur. Ona görə də bu cür layihələrin mütəmadi olaraq davam etdirilməsi arzuolunandır. Unutmayaq ki, Vətən müharibəsi iştirakçıları bütün prosesləri, savaşı öz gözləri ilə görüb, yaşayıblar. Onların hər birinin qəhrəmanlıq hekayəsi dastana bərabərdir. Qəhrəmanların öz dillərindən savaşın, torpaqlarımız uğrunda aparılan mübarizəni eşitmək gənclərimiz üçün əla motivasiyadır. Eyni zamanda o hadisələri canlı yaşamış bu qəhrəmanlar digər əsgər yoldaşları, şəhid olmuş qardaşları haqqında da ətraflı danışırlar. Bu da çox önəmli məqamdır. Bacardığımız qədər belə layihələri ardıcıl həyata keçirtməli, qazilərlə görüşləri sıxlaşdırmalıyıq. Hətta onların hər biri haqqında sənədli filmlərin çəkilməsi, müsahibələrinin KİV vasitəsilə yayılması təbliğat işini daha genişmiqyaslı edər və hədəfə çatdırar. Hamı bu işdə səfərbər olmalıdır. Qəhrəmanlarımız, qazilərimiz, şəhid ailələri də onlara qarşı daim diqqət və qayğının olduğunu hiss etməlidirlər".