“Ermənilər tərəfindən Qarabağın erməni icmasının guya humanitar böhranla qarşılaşmasına dair dezinformasiyaların həqiqətə uyğun olmadığı hər ötən gün ortaya çıxır”.
Bunu Milli Məclisin deputatı Naqif Həmzəyev Rusiya Xarici İşlər Nazirliyinin (XİN) rəsmi nümayəndəsi Mariya Zaxarovanın açıqlamasında “yaxın gələcəkdə Ağdam marşrutu ilə paralel olaraq Laçın dəhlizinin də açılacağını və bundan sonra humanitar yardımın hər iki istiqamətdə müntəzəm olaraq maneəsiz şəkildə regiona gedəcəyini gözləyirik”, -deyə səsləndirdiyi fikirlərə münasibət bildirərkən deyib.
Onun sözlərinə görə, Laçın yolu ətrafında yaranmış humanitar tır şousu iflasa uğramaqdadır: ” Azərbaycanın təklif etdiyi Ağdam -Xankəndi yolundan istifadədən imtina edən Ermənistan əslində Xankəndində heç bir humanitar böhran olmadığını ortaya çıxartdı. Azərbaycanın göndərdiyi humanitar yardımı qəbul etməyən separatçılar Rusiyanın göndərdiyi humanitar yükü də 2 gün Bərdə şəhərində saxlatdıqdan sonra qəbul etdilər. Rəsmi Bakı Ağdam-Xankəndi yolunun işə düşəcəyi təqdirdə Laçın yolunun da açılacağı ilə bağlı fikir səsləndirmişdi. Lakin burada incə məqam var. Yalnız bir tırın Ağdam-Xankəndi yolundan keçməsi bu yolun açılması demək deyil. Yol işlək olmalıdır. Separatçıların erməni icmasını girov saxlamasına son verilməli, Azərbaycan cəmiyyətinə reinteqrasiyasına yaşıl işıq yandırılmalıdır. Ümid edirik ki, Ağdam-Xankəndi yolu tam şəkildə açılacaq və humanitar yüklərin daşınması mümkün olacaq”.
Deputatın fikrincə, Ağdam-Xankəndi yolunun tam açılması Ermənistanın, xüsusilə də separatçıların həqiqətən də kommunikasiyaların açılmasında maraqlı olduqlarını göstərəcək: “Belə olarsa, Laçın yolu vasitəsilə də yük daşınmasına icazə verilə bilər. Xüsusilə də bir məqamı qeyd etməliyik ki, Laçın yolu humanitar daşınmalar üçün açıqdır. Beynəlxalq Qırmızı Xaç Cəmiyyətinin avtomobillərinin hərəkətinin şahidi oluruq. Burada gömrük və sərhəd xidmətləri öz işini görür. Proseslər Azərbaycanın xeyrinə cərəyan edir. Rəsmi Bakı öz istəyini diqtə etməkdə davam edir. Tezliklə Ermənistanın reallıqları dərk edəcəyinə inanırq”.