“Sonuncu Brüssel görüşündən sonra ermənilərin danışıqlar prosesini uzatmaq üçün əllərində bir bəhanənin qalmadığı məlum oldu. Bunun ardınca ermənilərin növbəti təxribatlara əl atma ehtimalı daha da artdı. Xüsusilə də Ermənistan baş naziri Nikol Paşinyanın Avropa İttifaqı Şurasının Prezidenti Şarl Mişelə qondarma separatçı qrupun rəhbəri Arayik Artunyanın məktubunu təqdim etməsi də ermənilər üçün sonuncu cəhd idi”.
Bu fikirləri Milli Məclisin deputatı Naqif Həmzəyev iyulun 17-i gecə saatlarında baş separatçı Araik Arutyunyan Qarabağdakı hayklara müraciət edərək onları Laçın yolunun “bağlı qalması”na etiraz olaraq Xankəndində fasiləsiz oturaq aksiya keçirməyə çağırmasına münasibət bildirərkən deyib.
Onun sözlərinə görə, əhalini mitinq və etirazlara səsləmək Arayikin sonuncu çırpınışlarıdır: “Azərbaycan ərazisində yaşayan erməni icmasını separatçıların cəngindən qurtarmağın vaxtı çatıb. Uzun illərdir ki, həmin separatçılar əhalinin hüquqlarını müdafiə etmək adı altında onları əsir saxlayaraq hüquqlarını pozurlar.
Separatçıların etiraz aksiyalarına başlaması, Azərbaycanın humanitar məqsədlərlə təklif etdiyi Ağdam-Xankəndi yolundan istifadə edilməsi, həmçinin də Laçın yolunun bağlanmasına etirazın olması çox yanlış addımdır. Onların atdığı bu kimi addımlar ərazilərdə yenidən gərginliyi artırmaq, təxribatlar törətmək üçün zəmin yaradır. Azərbaycan bu günə qədər çox təmkinli və ləyaqətli davranıb. Ermənistandan fərqli olaraq proseslərin sülh yolu ilə öz həllini tapmasına çalışmışıq “.
Deputatın fikrincə, ermənilərin tək istəyi Azərbaycanın onların səhvini təkrarlamasıdır: “Biz heç bir zaman dinc əhaliyə qarşı silah işlətməmişik, kütləvi qırğınlar törətməmişik. Əksinə ermənilər Qarabağda Xocalı soyqırımını və digər qətliamları həyata keçiriblər. Hətta 44 günlük Vətən müharibəsində də Azərbaycan ordusu yalnız əli silah tutan erməni quldurlarına qarşı döyüşüb. Bir nəfər belə dinc əhalinin burnu qanamayıb. Ermənilər bu aksiyaları başlatmaqla təxribata zəmin yaradırlar. Öz əhalisinə qarşı hansısa təxribatı həyata keçirib bizim üzərimizə atmaq istəyə bilərlər. Buna görə də Azərbaycan soyuqqanlılığını qoruyubsaxlamalıdır. Sonuna qədər proseslərin beynəlxalq qanunvericilik çərçivəsində həll edilməsinin tərəfdarıyıq. Brüsseldə baş tutmuş sonuncu görüşdən sonra Nikol Paşinyan da vəziyyətin nə yerdə olduğunu anladı. Separatçıları silahlarını təhvil verərək Azərbaycan ərazilərini tərk etməyə çağıracaq. Bunu açıq formada etməsə belə gizli mesaj ötürməlidir. Belə olduğu halda Azərbaycanın antiterror əməliyyatı keçirməsinə ehtiyac da qalmayacaq “.