"Dəfələrlə Beynəlxalq Qırmızı Xaç Komitəsinin, eyni zamanda Rusiya sülhməramlılarının erməni quldur dəstələrinin, separatçıların dəstəklənməsində, onlara silah-sursat verilməsində yaxından iştirak etdiyini əvvəllər də söyləyirdik".
Bu sözləri açıqlamasında millət vəkili Naqif Həmzəyev deyib.
Onun sözlərinə görə, əfsuslar ki, beynəlxalq ictimaiyyət və təşkilatlar çağırışları görməzdən gəlir, qulaqardına vururdu:
"Laçın yolu üzərində Azərbaycan tərəfindən sərhəd-keçid məntəqəsinin qurulmasından sonra bu yolun humanitar məqsədlərlə daim açıq olduğunu, ancaq bütün avtomobillərin və şəxslərin normal qaydalar çərçivəsində yoxlanılmasının həyata keçirildiyini vurğuladıq. Məhz bu yoxlamalar nəticəsində BQXK-nin qaçaqmalçılıqla məşğul olduğunu sübut edən faktlar əlimizə düşdü. İlk növbədə bu suala cavab tapmalıyıq ki, nəyə görə BQXK-nin Azərbaycan ofisi fəaliyyət göstərdiyi halda Azərbaycan ərazilərinə Ermənistan ofisinin nümayəndələri səfərlər təşkil edirlər?! Bu sual hamını düşündürməlidir. Nə üçün BQXK öz mandatının xaricində başqa fəaliyyətlə məşğul olur? Bu hal beynəlxalq ictimaiyyətə ətraflı çatdırılmalıdır və suallara cavab istənilməlidir”.
N.Həmzəyev bildirib ki, biz Azərbaycan ərazilərində terrorun, təxribatların, hər hansı qanunsuz fəaliyyətin dayandırılmasını istəyirik:
“Ancaq beynəlxalq təşkilatlar mandatlarından kənar olaraq separatçıları himayə edəcəkləri halda biz bu təxribatların kökünü kəsə bilmərik".
Parlament üzvü vurğulayıb ki, təcili surətdə BQXK-nin Ermənistan ofisinin Azərbaycan ərazilərində fəaliyyəti dayandırılmalıdır:
"Onlar ümumiyyətlə, Azərbaycan ərazilərinə buraxılmamalıdır. Komətinin Azərbaycan ofisi bu fəaliyyəti özü həyata keçirməlidir. Belə təqdirdə hansısa qaçaqmalıçılıq və rüşvət qarşılığında hər hansı əməllərin qarşısı alınacaq. Yalnız humanitar missiya yerinə yetiriləcək. Daha sonra erməni əsilli vətəndaşlar Azərbaycan tərəfindən hansısa humanitar xidmətlərin göstərilməsini də qəbul edəcək. Onlar əslində bunu çoxdan istəyirlər. Sadəcə separatçılar bu prosesi yubadırlar. Çalışmalıyıq ki, rus sülhməramlılarının nəzarəti ilə müxtəlif yollarla separatçılara silah-sursat daşınmasının qarşısını alaq. Bacardığımız qədər öz ərazilərimizdə qanunsuz fəaliyyətlərə göz yummamalıyıq. Xarici ölkə səfirlərinin, diplomatik nümayəndələrin də həmin ərazilərə səfərləri təşkil olunmalıdır. BQXK-nin qanun pozuntuları əcnəbilərə də nümayiş etdirilməlidir. BQXK-nin Ermənistan ofisi faktiki olaraq bizneslə məşğuldur. Bu da həmin təşkilatın mandatına ziddir".
Qeyd edək ki, son günlərdə Dövlət Sərhəd Xidməti tərəfindən Beynəlxalq Qırmızı Xaç Komitəsinə aid nəqliyyat vasitələrində dəfələrlə qanunsuz yolla müxtəlif növ qaçaqmalın keçirilməsi cəhdləri aşkarlanıb. Nəticədə Azərbaycan Respublikasının Cinayət Məcəlləsinin müvafiq maddələri ilə cinayət işi açılıb. Zəruri istintaq tədbirləri həyata keçirilənə qədər Laçın dövlət sərhədindən buraxılış məntəqəsindən keçid müvəqqəti olaraq dayandırılıb. Qeyd edək ki, Ermənistan ilə dövlət sərhədində Laçın buraxılış məntəqəsi fəaliyyətə başladığı tarixdən BQXK-ya məxsus nəqliyyat vasitələrinin dövlət sərhədindən hərəkətinə lazımi şərait yaradılıb. Müvafiq qaydada sərhəd və gömrük nəzarətindən keçməklə dövlət sərhədindən buraxılıblar.