"Fransada 17 yaşlı gəncin qətlə yetirilməsi irqi və dini zəmində baş vermiş bir cinayətdir. Bu cinayət fonunda baş vermiş iğtişaşlar Fransa hökumətinin vətəndaşların nə dərəcədə sosial rifahının yaxşılaşdırılmasına maraqlı olub-olmadığını ortaya qoyur. Eyni zamanda, bu Makron hökumətinin səriştəsiz siyasət yeritməsinin bariz nümunəsidir". Bu sözləri açıqlamasında deputat Naqif Həmzəyev deyib.
Onun sözlərinə görə, öz daxilində ədaləti bərpa edə bilməyən bir hökumət təəssüf ki, Ermənistanla dostluq münasibətləri davam etdirir və ermənidən daha çox onu düşünür: "Azərbaycanın suveren işlərinə, daxili məsələlərinə qarışır. Azərbaycanın Ermənistanla sülh müqaviləsi imzalaması prosesinə maneçilik törədir. Əslində, Fransa Ermənistanın bu cür qərəzli və əsassız formada müdafiə etməklə onu daha da çətin vəziyyətə salır. Bəzi ermənilər bunu anlayırlar. Amma revanşist fikirlərlə yaşayan, separatçıların güclənməsini istəyən qüvvələr var ki onlar Fransanın bu addımlarını yüksək qiymətləndirir. Makron hökuməti anlamalıdır ki, ilk növbədə öz daxilində baş vermiş proseslərin ədalətli prinsiplər əsasında həllinə çalışmalıdır".
Deputat sözlərinə davam edərək bildirib ki, bugünə qədər müstəmləkə siyasəti həyata keçirən, çox sayda insanın qətlində əli olan bir dövlətin Cənubi Qafqazda ədalət prinsiplərindən danışmağa cəhd etməsi normal hal deyil. Biz bunu qətiyyən qəbul etmirik. Heç bir dövlətin Azərbaycanın daxili işlərinə qarışmaq haqqı yoxdur. Fransanın Ermənistanıa bu cür yaxınlıq münasibətlərini davam etdirməsi onun tarixinə və demokratiyasına böyük bir xələl yetirir. Düşünürəm ki, gec-tez Makron hökuməti dəyişəcək. Bütün dövlətlərlə dostluq münasibətləri qurmaqda maraqlı olan bir hökumət Fransada bərqərar olacaq. Bundan sonra biz Fransa ilə normal münasibətlər qurmağa davam edəcəyik. Çünki bizim Fransa xalqı ilə heç bir problemimiz yoxdur".