14 iyul Milli Məclisin növbədənkənar sessiyasının sonuncu iclası keçiriləcək.
Bununla da Milli Məclisin deputatları tətilə çıxacaq.
Parlamentin üzvləri iyulun 15-dən avqust ayının 30-dək istirahətdə olacaqlar.
Milli Məclisin deputatlarından bu yay istirahətini harada və necə keçirəcəkləri ilə bağlı sorğu keçor
Deputat Fazil Mustafa hələlik istirahət haqqında düşünmədiyini bildirib:
"Yay müddətində də müalicəm davam edəcək. Hazırda bütün diqqəti buna yönəldirəm. Yəqin ki, ölkə daxilində bu prosesə davam edəcəm. Çünki hazırda önəmli olan müəlicəmi tamamlamaqdır. İmkan düşdükcə bir-iki günlük hansısa bölgədə ola bilərəm. Ölkədən kənara çıxmaq niyyətim yoxdur”.
Deputat Azər Badamov məzuniyyət vaxtında öz seçildiyi və doğulduğu rayonunda olmağı planlaşdırır:
"Ola bilsin ki, bir neçə günlük ölkəmizin digər rayonlarına da səfər edim. Amma Qusarın havası, təbiətin gözəlliyi və qonaqpərvər insanları rayonumuza gələn hər bir turist üçün də gözəl istirahət etməyə imkan verir. Ona görə də istirahətlərini hələ də planlaşdırmamış şəxslərə Qusarda dincəlməyi tövsiyə edirəm”.
Deputat Rüfət Quliyev tətildə xaricə getməyi planlaşdırmadığını deyib:
"Tətilimin yarısını bağda, yarısını isə Lənkəranda keçirəcəm. Adətən mən ən azı iki dəfə bir günlük də olsa, Lənkərana gedirəm. Bu tətilin bir həftəsini doğma diyarım Lənkəranda keçirməyi planlayıram. Çayxanada oturub insanlarla söhbət edirəm, qeyd olunan problemləri həll etməyə çalışıram.
İnsanlarla masa arxasında oturub bir stəkan çay içməkdən həzz alıram. Ona görə tətilimi bu formada keçirəcəm.
Doğma kəndim Stamurdov kəndində kifayət qədər dostlarım var. İstirahət zamanı hamı bura yığışır, maraqlı zaman keçiririk. Eyni zamanda məqalə yazmağı düşünürəm. İşlərin çoxluğundan buna zamanım olmurdu. Yaxşı kitabxanam var. Kitab oxumağı çox xoşlayıram. Hesab edirəm ki, insan öz asudə vaxtını düzgün qurmalıdır. Şükür Allaha ki, son 25-30 ildə kifayət qədər xarici ölkələrdə olmuşam. Ona görə bu tətili daha çox Azərbaycanda keçirməyə üstünlük verəcəm”.
Deputat Naqif Həmzəyev istirahət üçün Azərbaycanın dilbər guşələri olduğunu deyib:
"Daxili turizm günü-gündən inkişaf etməkdədir. Hər il olduğu kimi mən bu ildə daha çox tətil günlərini Gəncə şəhəri və onun ətrafında olan istirahət yerlərində keçirməyi planlaşdırıram. Göygöl, Daşkəsən, Gədəbəy ərazisində istirahət üçün çox gözəl şərait var. Bununla yanaşı cənub bölgəsinədə istirahət etməyi planlaşdırıram. Çünki o ərazilərdə öyrənib, kəşf edilməli çoxlu yerlər var. Vətəndaşlarımızı da turizmin inkişafına töhfə verməyə çağırıram”.
Deputat onu da qeyd edib ki, Azərbaycanda təyyarə qiymətləri çox bahadır:
"Xaricə səfər planlamaq indiki dövrdə çox çətindir. Əgər kim əvvəlcədən ucuz ekonom biletlər ala bilibsə, onlar üçün daha rahatdır.
Ancaq hazırda hədəfimizdə olan daxili turizm potensialından istifadə edərək tətil günlərimizi Azərbaycanın dilbər guşələrində keçirməkdir.
Yay aylarında bir çox rəsmi tədbirlərdə iştirakla bağlı planlarım da var. Əgər baş tutarsa, həmin səfərlərə qatılacam. Ümid edirəm ki, hər kəs bu tətil günlərini bacardığı qədər səmərəli keçirəcək”.