Azərbaycan ərazilərində müvəqqəti yerləşdirilmiş Rusiya sülhməramlı qüvvələri Laçında, Həkəri çayının üzərindəki körpüdə ucaldılan Azərbaycan Bayrağına qarşı hörmətsizlik ediblər. Sosial şəbəkələrdə bununla bağlı kadrlar yayılıb. Görüntülərdə rusiyalı hərbçinin bayrağı çıxarmaq üçün onun asıldığı dirəyi aşırdığı görünür.
Bununla bağlı açıqlama verən millət vəkili Naqif Həmzəyev deyib ki, Rusiya sülhməramlıları bəzən öz missiyalarını yerinə yetirmirlər. Bəzən də öz missiyalarının nədən ibarət olduğunu unudurlar.
“Rus sülhməramlılarının içərisində ermənispərəst, ermənilərə meyilli, erməniəsilli rus hərbiçiləri var ki, onlar münasibətləri daha da gərginləşdirmək istəyirlər və təxribat törətməyə meyillidirlər.
Baş vermiş bu hadisəyə görə Rusiya tərəfi və rus sülhməramlıları üzr istəməlidirlər. Bayrağımıza hörmətsizlik edən əsgər sülhməramlıların sırasından kənarlaşdırılmalıdır”, - deputat bildirib.
Onun sözlərinə görə, bu cür təxribatların davam edəcəyi təqdirdə rus sülhməramlılarının yaxın gələcəkdə bölgədə yeri ümumiyyətlə olmayacaqdır.
“Azərbaycan tərəfi də çalışır ki, ən qısa zamanda rus sülhməramlılarının missiyası başa çatsın”, - millət vəkili əlavə edib.