Beynəlxalq təşkilatlar bu prosesi təcili olaraq dayandırmalı, işğalçı ölkəni fikrindən daşındırmalıdırlar
Ermənistanın Azərbaycanın Naxçıvan Muxtar Respublikası ilə həmsərhəd ərazisində - Arazdəyən kəndində 16 500 kvadratmetr sahədə illik istehsal gücü 180 000 ton olan iri metallurgiya zavodunun inşasının aparılması ilə bağlı Ermənistanın iqtisadiyyat naziri Vahan Kerobyan tərəfindən sosial media hesabında məlumat və bu faktı təsdiq edən videogörüntülər yayılıb.
Bu, Ermənistanın növbəti dəfə beynəlxalq hüquq norma və prinsiplərini, xüsusilə də BMT-nin Avropa İqtisadi Komissiyasının “Transsərhəd kontekstdə ətraf mühitə təsirin qiymətləndirilməsi haqqında” Konvensiyasının (Espo Konvensiyası) müddəalarını kobud surətdə pozması deməkdir.
Milli Məclisin deputatı Naqif Həmzəyev mövzu ilə bağlı açıqlamasında bildirdi ki, Ermənistan tərəfindən Naxçıvan, Türkiyə sərhədinə yaxın ərazilərdə ABŞ-ın 70 milyon dollar investisiyası əsasında iri metallurgiya zavodunun inşası planlaşdırırlır: “Artıq bu zavodun tikintisi ilə bağlı erməni rəsmiləri tərəfindən açıqlamalar da verilib. Erməni mediasında bu layihə ilə bağlı kifayət qədər məlumatlara rast gəlinir. Belə bir metallurgiya məhz Naxçıvanla sərhəd ərazidə tikilməsi bölgənin ekosisteminin pozulmasına, ekoloji fəlakətin baş verməsinə gətirib çıxara bilər. Xüsusilə də bu ərazilərdə kənd təsərrüfatı məhsullarının istehsalı ilə məşğul olan kəndlilərin məşğulluq problemi ortaya çıxa bilər. Nəticə etibarı ilə həmin ərazilərdə həyatın varlığı belə şübhə altına düşə bilər. Bu səbəblərə görə sözügedən zavodun tikintisi ilə ölkəmizdə fəaliyyət göstərərn qeyri-hökumət təşkilatları, ictimai fəallar, eyni zamanda Türkiyədəki QHT və ictimai fəallar aidiyyəti qurumlara, beynəlxalq təşkilatlara müraciət etməlidirlər.”
ABŞ belə bir təhlükəli layihəni maliyyələşdirməyi təcili dayandırmalıdır
N.Həmzəyev qeyd etdi ki, bu zavodun tikintisinə qətiyyən icazə vermək olmaz: “Xüsusilə də ekologiyanın qorunmasına önəm verən ABŞ belə bir təhlükəli layihəni maliyyələşdirməyi təcili dayandırmalıdır. Ermənistan da öz hiyləgər niyyətindən, fikrindən əl çəkməlidir. Bu işğalçı ölkənin ərazisində kifayət qədər boş ərazilər var və düşünürəm ki, bu metallurgiya zavodunu tamamilə fərqli ərazidə tikə bilərlər. Naxçıvanla sərhəddə belə bir təhlükəli zavodu tikməklə onlar bu müəssisənin bütün tullantılarını məhz Azərbaycan ərazisinə axıtmaq istəyirlər. Həmçinin havaya buraxılacaq zəhərli qazlar vasitəsilə də Naxçıvanın ekologiyasını tamamilə çirkləndirmiş olacaqlar. Düşünürəm ki, Azərbaycan rəsmiləri də aidiyyəti qurumlar qarşısında məsələ qaldırmalıdırlar və beynəlxalq təşkilatlar bu prosesi təcili olaraq dayandırmalı, işğalçı Ermənistanı bu fikrindən daşındırmalıdırlar.”