“Türkiyədəki seçkiləri dünya ictimaiyyəti yaxından izləyir. Heç kəsə sirr deyil ki, faktiki olaraq Qərb Rəcəb Tayyib Ərdoğanın rəqiblərinin qalib gəlməsini istəyir. Bunu Qərb mediasından açıq şəkildə izləyə bilərik. Amma buna baxmayaraq Azərbaycan cəmiyyəti daha çox Ərdoğanın qalib olmasını istəyir. Biz düşünürük ki, 28 may tarixində Türkiyə xalqı öz doğru seçimini edəcək”. Bu sözləri açıqlamasında deputat Naqif Həmzəyev deyib.
Onun sözlərinə görə, onlar layiqli namizədə səs verəcək: “Amma unutmaq olmaz ki, son 20 ildə Türkiyə özünün ən güclü dönəmini yaşamaqdadır. Artıq Türkiyə qlobal məkanda söz sahibinə çevrilib. Yalnız iqtisadi problemlər Türkiyə cəmiyyətində müəyyən narazılığa səbəb olub. İstənilən halda terrora qarşı mübarizənin yüksək səviyyədə təşkil edilməsi, Türkiyənin milli maraqlarının qorunub saxlanması, türk dünyasının birləşdirilməsi və bu kimi önəmli sahələrdə qardaş ölkə böyük yol qət edib”.
Deputat sözlərinə davam edərək bildirib ki, hərbi sənayenin sürətlə inkişaf etməsi, kosmos dövlətinə çevrilmək üçün dövlət layihələrinin həyata keçirilməsi də Türkiyənin uğurları sırasına daxildir: “Bu baxımdan Türkiyədə növbəti dönəm üçün hazırda iqtidarda olan Rəcəb Tayyib Ərdoğanın qalib gəlmə ehtimalı daha çoxdur. Biz bu prosesləri yaxından izləyirik. Amma təəssüf ki, bizim seçmək və Türkiyədə səs vermək hüququmuz yoxdur. Yalnız proseslərin Türkiyə xalqı üçün xeyirli və uğurlu nəticələnməsinə ümid edirik”.