“Azərbaycan Respublikasının Prezidenti İlham Əliyev həmişə tarixi və dini abidələrin qorunması, bərpası və vətəndaşların istifadəsinə verilməsi üçün müvafiq göstərişlər və tapşırıqlar verib. O, eyni zamanda bu abidələr bərpa olunarkən hər bir daşına diqqət göstərilməsinə nəzarət edib. Sovetlər dövründə Azərbaycanda din təsir altında idi. Yəni, faktiki olaraq din ilə məşğul olmaq qadağan idi”. Bu sözləri açıqlamasında deputat Naqif Həmzəyev deyib.
Onun sözlərinə görə, bu səbəbdən bir çox tarixi və dini abidələrimiz dağıdılmış və ya başqa məqsədlərlə istifadə edilmişdir: “Daha sonra erməni təcavüzü nəticəsində Qarabağ və Şərqi Zəngəzur ərazilərində olan tarixi-mədəni abidələrimiz onlar tərəfindən talan edilib. Ona görə Azərbaycana məxsus məscidlər də dağıdıldı. Bu ərazilərdə demək olar ki, 60-dan çox məscid tamamilə yer üzündən silinib. Amma bir neçə məscid müəyyən səbəblərdən tam şəkildə dağıdılmayıb. Bu dini abidələrin yenidən vətəndaşların istifadəsinə verilə bilməsi üçün burada yenidənqurma və bərpa işlərinin aparılması zəruri idi. Bunlardan biri Şuşa şəhərində olan məscidlər, xüsusilə də Yuxarı Gövhər Ağa məscididir ki, onun restavrasiya olunması üçün dövlət başçımız İlham Əliyev və Birinci vitse-prezident Mehriban xanım Əliyeva dəfələrlə buraya səfərlər ediblər”.
Deputat sözlərinə davam edərək bildirib ki, Yuxarı Gövhər Ağa məscidinin restavrasiya olunmasını Heydər Əliyev Fondu həyata keçirirdi: “Ölkə Prezidenti İlham Əliyevin ailə üzvləri ilə birlikdə Şuşaya sonuncu səfəri zamanı Yuxarı Gövhər Ağa məscidini ziyarət etməsi və onun hazırkı vəziyyəti ilə tanış olmaları bir daha Azərbaycanda din və dövlət münasibətlərinin bariz göstəricisidir. Eyni zamanda, tarixi abidələrimizə sahib çıxmağımız onların bizə məxsus olduğunun bir mesajıdır. Bununla yanaşı, Qarabağ və Şərqi Zəngəzurda olan tarixi və dini abidələrin bərpası həyata keçirilir. Biz inanırıq ki, yaxın gələcəkdə bütün abidələrimiz bərpa olunacaq və həmçinin ermənilər tərəfindən özününküləşdirilməyə çalışılan xristian-alban kilsələri də əvvəlki görkəminə qayıdacaq. Güclənən Azərbaycan bu ərazilərə nəzarəti daha da artıracaq. Bu ərazilər də tarix boyu Azərbaycana və azərbaycanlılara məxsus olacaq”.