Milli Məclisin Gənclər və İdman Komitəsinin üzvləri İrəvanda keçirilən ağır atletika üzrə Avropa Çempionatının açılış mərasimində Azərbaycan bayrağının yandırılmasına, dövlət atributuna qarşı barbarlıq edən erməni stilistin cəzalandırılmamasına etirazlarını bildiriblər.
Azərbaycan ictimaiyyətinin hiddətinə səbəb olan təxribat barədə danışan deputat Naqif Həmzəyev bildirib ki, ermənilər Azərbaycana qarşı nifrət və kin bəsləyirlər.
"Onlar həm təxribatlar törədirlər, həm də əsir düşən hərbçilərimizə qarşı qəddarlıq edirlər. Beynəlxalq idman yarışında təxribat törədilməsi, Azərbaycan bayrağının təhqir olunması və yandırılması baş verən hadisələrin kuliminasiya nöqtəsidir. Ermənilər hələ də faşist düşüncələrindən əl çəkə bilmirlər. Onlar revanş haqqında fikirləşirlər. Təəssüflər olsun ki, ermənilər ağıllanmayıblar və terrorçuluq xislətindən qurtulmaq istəmirlər".
Deputat beynəlxalq ictimaiyyəti Ermənistanın təxribatları qarşısında susmamağa çağırıb:
"Ermənilərin törətdiyi vəhşiliklər pislənilməli, Ermənistana təzyiq göstərilməlidir. Biz isə beynəlxalq təşkilatlara müraciətlər ünvanlamalıyıq. Beynəlxalq təşkilatları ermənilərin əsl simalarını görməyə vadar etməliyik. Beynəlxalq qurumlar hələ də ikili standartlardan çıxış edirlər və ermənilərin cinayətlərini görməzdən gəlirlər. Onlar erməni cinayətlərini demək olar ki, gizli formada dəstəkləyirlər".
Naqif Həmzəyev idmançılarımızın İrəvandan qayıtmasının doğru qərar olduğunu vurğulayıb.
"İdmançıların geri qayıtması ilə bağlı qərar düzgündür. Elə şəraitdə idman yarışlarını davam etdirməyin heç bir mənası yoxdur. İdman sülhü tərənnüm edir. Azərbaycanlıların orada həyatlarının risk altında olduğunu düşünürəm. Onlar mütləq geriyə qayıtmalıdırlar. Gələcək beynəlxalq turnirlərin Ermənistanda keçirilməsinə qadağa qoyulmalıdır. Çünki Ermənistan tərəfi idmançıların təhlükəsizliyi və beynəlxalq qaydalara əməl edilməsi istiqamətində ciddi nöqsanlara yol verirlər. Ermənistan uzun müddət beynəlxalq tədbirlərin keçirilməsindən kənarlaşdırılmalıdır".
Cəbi Quliyev də İrəvanda bayrağımızın yandırılmasının qəbuledilməz hadisə olduğunu söyləyib.
"İrəvanda Azərbaycan bayrağının yandırılması qəbuledilməzdir. İdman əxlaqına sığmayan, idmanın siyasiləşdirilməsi fonunda baş verən hadisə Ermənistanın əsl xislətini göstərmiş oldu. Etnik nifrət, rasizm və Azərbaycanfobiyanı bütün dünyaya nümayiş etdirən ermənilərin bu addımı həm də idmanın xoşniyyətliliyinin və xalqlar arasında sülhü təbliğ edən nəcib məqsəd və prinsiplərlə ilə tam ziddiyyət təşkil edir".
Deputat hesab edir ki, dünya ictimaiyyəti bunu irqçi addım kimi qəbul etməldir:
"Düşünürəm ki, tezliklə Avropa Ağır Atletika Federasiyası İrəvandakı təxribatla bağlı addımlar atmalı, dünyanın idman ictimaiyyəti Ermənistanda baş verən hadisəni irqçilik kimi qiymətləndirməlidir. Ermənistanda Azərbaycan bayrağının yandırılması orada xalqımıza qarşı dövlət səviyyəsində nifrət siyasətinin aparıldığını, bu ölkədəki rasizm və ksenefobiyanın kök saldığını göstərdi. Bütün dünya ermənilərin necə vandal və təxribatçı olduqlarını bir daha öz gözləri ilə gördülər".
Qeyd edək ki, ötən gün İrəvanda ağırlıqqaldırma üzrə Avropa çempionatının açılış mərasimində Azərbaycan bayrağı yandırılıb. Bayrağı yandıran təxribatçının erməni dizayner Aram Nikolyan olduğu müəyyən edilib. O, polis tərəfindən saxlanılsa da, sonradan azadlığa buraxılıb. Hadisə ilə bağlı Azərbaycanda cinayət işi açılıb, milli komandamızın yarışı tərk etməsinə qərar verilib.