“Ermənistan və Azərbaycan münasibətlərinin normallaşmasının əleyhinə çıxan qüvvələr var. Bunlar xüsusilə separatçılar, revanşist qüvvələr və erməni lobbisidir”.
Bu fikirləri açıqlamasında Milli Məclisin deputatı Naqif Həmzəyev bildirib.
Onun sözlərinə görə, Azərbaycan 44 günlük Vətən müharibəsində qələbə qazandıqdan sonra regionda dayanıqlı və uzunmüddətli sabitliyin əldə edilməsi üçün Ermənistana sülh əlini uzatdı:
“ Müxtəlif formatda keçirilən görüşdə müəyyən razılıqlar əldə olundu.Lakin Ermənistan tərəfi hər-vəchlə bu prosesi uzadıb təxribatlar törədib sülhə gedən yolda maneələr yaratdılar. Bu gün də eyni siyasət davam etdirilir. Danışıqlar zamanı sülhə maraqlı görünən Paşinyan hakimiyyəti əməldə bunu reallaşdırmır. Tərəflər arasında münasibətlərin normallaşması istiqamətində ölkəmiz 5 bəndlik təklif irəli sürüb”.
Deputat Qarabağda yaşayan erməni icmasının Azərbaycan cəmiyyətinə reinteqrasiyası ilə əlaqədar mart ayının 1-də Xocalıda baş tutan görüşlə əlaqədar bir neçə məqamlara toxunub:
“Onun davamı kimi Bakı görüşünün keçirilməsi təklif edildi. Lakin iki dəfə müraciətimiz müsbət cavab almadı. Azərbaycan ərazisində rus sülhməramlılarının nəzarəti altında yaşayan vətəndaşlar bu prosesdən uzaqlaşdırırlar. Burada qondarma qurumun, separatçıların öz mövqelərini gücləndirməsi üçün danışıqlardan qaçırlar. Hətta onlar təxribatlara meyillilik nümayiş etdirirlər. Azərbaycan Silahlı Qüvvələri tərəfindən bu təxribatların qarşısı uğurla alınsa da ermənilər hələ də düzgün nəticə çıxartmayıblar. Avropa İttifaqı müşahidə missiyasının bölgəyə gəlişindən sonra daha da cəsarətləniblər. Xüsusilə də havadarlarlarının “çaldığı mahnıları ifa edərək” Azərbaycanla münasibətlərin normallaşmasından qaçırlar. Rəsmi Bakı istənilən vaxt öz ərazilərində stabilliyi bərpa edəcək. Zərurət yarandığı təqdirdə həmin ərazilərdə antiterror əməliyyatı davam etdiriləcək. Erməni icması ilə Azərbaycan cəmiyyəti arasında reinteqrasiya məsələsi yaxın vaxtlarda mütləq baş tutacaq”.