1988-ci ildən başlayaraq Qarabağda qanunsuz fəaliyyət göstərən erməni silahlı hərbi birləşmələri və Ermənistan Silahlı Qüvvələri tərəfindən yaşayış məntəqələrində və dövlət obyektlərində maddi sərvətlər, mədəniyyət abidələri talanıb, dağıdılıb, azərbaycanlı əsir və girovlara dəhşətli işgəncələr verilib, beynəlxalq humanitar hüquqla mühafizə olunan mülki və digər şəxslərə amansız rəftar göstərilib, azərbaycanlıları məhv etmək məqsədilə soyqırım, deportasiya, işgəncələr edilib. Tarix boyu ermənilər tərəfindən Azərbaycan xalqına qarşı sülh və insanlıq əleyhinə cinayətlər, habelə təxribat, terrorizm və başqa ağır cinayətlər törədilib. Ermənistanın törətdiyi cinayətlərin beynəlxalq müstəvidə ifşa olunması istiqamətində Azərbaycan dövləti və cəmiyyəti birgə fəaliyyət göstərir.
Mövzu ilə bağlı fikirlərini bölüşən Milli Məclisin deputatı Naqif Həmzəyev deyib ki, iki ildən çox keçən müddət ərzində Azərbaycan sülhün əldə olunması üçün bütün səylərini səfərbər etsə də, Ermənistan tərəfi sülhə yaxınlaşdığımız zaman həmişə təxribatlar törədib, sülhə kölgə salıb.
Deputat 2022-ci ilin avqust və sentyabr aylarında baş vermiş təxribatları xatırladıb:
“Faktiki olaraq bütün üçtərəfli görüşlərdə əldə edilən razılaşmalar avqust və sentyabr aylarındakı təxribatlardan sonra sarsıldı. Hətta Praqa görüşündə çox böyük üstünlüklər əldə edilsə də, dekabrda sülh üçün önəmli olan görüş baş tutmadı. Ermənistan tamamilə fərqli şərtlər irəli sürdü. Masada Fransanın da olması, bu proseslərdə moderatorluq etmək təklifi Azərbaycan tərəfindən qəbul edilmədi. Bir sözlə, Ermənistan həmişə təxribatlar törətməyə meyillidir. Ötən müddət ərzində dəfələrlə Azərbaycan tərəfindən rus sülhməramlılarının nəzarətində olan ərazilərə erməni separatçıları tərəfindən silah-sursat, terror dəstəkləyənlərin keçirilməsi sübut edilib. Sonuncu hadisələr zamanı da gördük ki, alternativ yollardan istifadə edərək həmin separatçılar Qarabağa yeni qüvvələr daşıyırlar. Bu isə deməyə imkan verir ki, Ermənistan yeni təxribatlara hazırlaşır. Üçtərəfli bəyanatın müddəalarına da baxsaq, görərik ki, Azərbaycan ən qısa zamanda keçmiş Laçın yoluna alternativ yol çəkdi, hazırladı, istifadəyə verdi. Bu yol birbaşa humanitar məqsədlər üçün istifadə edilir. Ancaq Ermənistan tərəfi bu yoldan iqtisadi və hərbi məqsədlər üçün “yararlanmaq” istəyir. Hərbçilərimiz dəfələrlə 2021-ci ildə və ondan sonrakı dövrdə istehsal edilmiş minaların Azərbaycan ərazisinə basdırılması faktını sübut ediblər. Azərbaycan torpaqlarının ermənilər tərəfindən minalarla çirkləndirilməsi, bu ərazilərin çox ağır vəziyyətə salınması nəticəsində son iki ildən çox müddət ərzində üç yüzdən çox şəhid vermişik, yaralılarımız olub. Ermənistan insanlıq əleyhinə cinayətlər törətməyə davam edir, bu əməllərindən əl çəkmir. Ermənilərin Qarabağa silah daşımasına qətiyyən imkan verməyəcəyik. Düşünürəm, ən qısa zamanda Ermənistan tərəfi baş verənlərlə bağlı doğru-düzgün nəticə çıxarmalıdır. Azərbaycan tərəfi isə Ermənistan və Azərbaycan ərzisində mümkün bütün kommunikasiyaların, yolların hər birinə nəzarət postlarının quraşdırılmasına nail olmalıdır. Əks təqdirdə, proses bu formada davam edəcək. Ermənilər əllərinə düşən fürsətdə Azərbaycan ərazilərinə silah, minalar, başqa ölkələrin vətəndaşları olan terroristlər gətirəcək, Azərbaycan ərazisində yenidən münaqişə ocağı formalaşdıracaqlar. Sadə erməni əsilli xalqla Azərbaycan arasında mümkün ola biləcək inteqrasiya prosesini ləngidəcəklər, əlaqələrin qurulmasına kölgə salacaq, düşmənçiliyi yenidən alovlandıracaqlar. Nəticədə, sülh prosesi daha da uzanacaq”.
N.Həmzəyev deyib ki, Azərbaycan tərəfi proseslərin ən qısa zamanda yekunlaşmasını istəyir:
“Dünya ictimaiyyətindən, bu prosesə tərəfdar olan Rusiyadan, Avropa ittifaqından, Amerikadan bunları tələb edirik. Ümid edirik ki, proseslər tezliklə sülhlə yekunlaşacaq. Avropa İttifaqı müşahidə missiyasının Ermənistana gətirilməsindən sonra Ermənistanda aktivlik görürük. Ermənistan tərəfi bu proseslərdən sonra bir az ürəklənib. Son günlər atəşkəsin pozulması da bununla əlaqəlidir. İstəyirlər, Azərbaycanı təxribata çəksinlər və Aİ-nin müşahidə missiyası müəyyən dərəcədə şahidlik etsin ki, Azərbaycan tərəfdən də atəş açılır, Azərbaycan atəşkəsi guya pozur, şərti Ermənistan-Azərbaycan sərhədini keçmək niyyətindədir. Yəni Ermənistan hay-küy saldı, ağladı, böyük təhlükələr olduğunu bildirdi, amma təxribatı törədən də, sərhədi pozan da özü oldu. Ermənistan böyük təxribata hazırlaşır, Azərbaycan tərəfi isə həmişəki kimi bu təxribatın qarşısını kəsəcək. Eyni zamanda Beynəlxalq Ədalət Məhkəməsində qarşılıqlı iddia qaldırılıb. Azərbaycan tərəfi Ermənistanın haqsız iddialarını, demək olar, zərərsizləşdirə bilib. Məhkəmə tərəfindən Ermənistanın iddiaları qəbul edilmədi. Qəbul edilən bir çox qərar var, bunlar faktiki olaraq Azərbaycan tərəfindən onsuz da yerinə yetirilirdi. Məsələn, Laçın yolundakı aksiya ekoloji terrorun qarşısını almaq məqsədilə keçirilir. Aksiyanın dayandırılması üçün tələblər mütləq yerinə yetirilməlidir. Humanitar məqsədlər üçün Laçın yolunu istifadə etmək mümkündür. Beynəlxalq Ədalət Məhkməsinə Ermənistana qarşı yaxın dövrdə mütləq təzminat tələb edilməsi ilə bağlı müraciətlər edilib. Ən qısa zamanda Qarabağda və Şərqi Zəngəzurda törədilmiş bütün insanlıq əleyinə cinayətlər, Azərbaycanın infrastrukturunun talan edilməsi, dağıdılması, mədəni, dini abidələrimizin, qəbiristanlıqlarımızın təhqir edilməsi faktları əsasında mütləq təzminat davası açılmalıdır. Ermənistan törətdiyi bütün bu cinayətlərə görə cavab verməlidir. Azərbaycan ərazilərində faydalı qazıntılarımızın, yataqların 30 ilə yaxın müddət ərzində talan edilərək Avropada fərqli bazarlarda satılması, Azərbaycan iqtisadiyyatına bu səbəbdən vurulmuş ziyanın qarşılanması da zərurətdir. Bu işləri həyata keçirən Ermənistan şirkətləri və onlara partnyorluq edən Avropa şirkətləri də dəymiş ziyanları ödəməlidirlər”.
"Azxeber.com"un redaktoru, Mətbuat Şurasının İdarə Heyətinin üzvü Hacıbəy Heydərli isə Ermənistanın törətdiyi müharibə cinayətləri ilə bağlı həqiqətlərin dünya ictimaiyyətinə çatdırılmasında medianın rolundan danışıb:
“Müharibə bitsə də, informasiya müharibəsi davam edir. Birinci Qarabağ müharibəsi illərindən bilirdik ki, düşmən bu məsələdə çox hiyləgərdir, hər zaman Azərbaycan əleyhinə kampaniyalar aparır. Xüsusən xarici mətbuatda Azərbaycanla bağlı dezinformasiyalar, feyk xəbərlər yayımlanırdı. Hətta 1992-ci ildə Xocalı soyqırımı baş verən günlərdə belə Xocalıya dəvət olunan xarici jurnalistlər guya bu soyqırımı azərbaycanlılar törədirmiş kimi dünya mediasına yalan xəbərlər yaymışdılar. Təbii ki, yalan, saxta xəbərlər Ermənistan cəmiyyətinin, dövlətinin bacardığı ən gözəl işlərdən biridir. Vətən müharibəsi günlərindən sonra da Azərbaycanda informasiya müharibəsi davam edir. Jurnalistlərimiz, ictimaiyyət nümayəndələrimiz bu məsələdə çox diqqətli olmalıdırlar. Təəssüflə deyə bilərəm ki, 44 günlük Vətən müharibəsində bir olan, bir nöqtəyə vuran mediamızda da, xalqımızda da, ictimaiyyətimizdə də müharibədən sonra artıq arxayınlaşma meyilləri görünür. Düşmən də bundan sui-istifadə edir. Amma bu da faktdır ki, düşmənin müharibə cinayətləri davam edir. 2020-ci il 10 noyabr anlaşmasından sonra da görmüşdük ki, ermənilər azərbaycanlılara qarşı çirkin kampaniya aparırlar. Üç yüzdən çox vətəndaşımızın mina qurbanı olması, qanunsuz silahların daşınması, Azərbaycan məscidlərində törədilən barbar hadisələr – bütün bunlar hamısı müharibə cinayətləridir. Azərbaycan mətbuatı, jurnalistlər bu məsələyə çox həssas yanaşmalı, həqiqətlərin dünya ictimaiyyətinə yayılmasına yaxından yardımçı olmalıdırlar”.
H.Heydərli vurğulayıb ki, Vətən müharibəsini qələbə ilə başa vurmağımız informasiya müharibəsinin bitməsi demək deyil:
“Hər bir media nümayəndəsi ayıq-sayıq olmalı, bu istiqamətdə işlər aparmalı, beynəlxalq əlaqələr qurulmalıdır. Xarici media, xarici KİV-lə münasibətlər yaranmalıdır. Biz heç vaxt xarici mətbuatın birtərəfli yazılarını istəmirik. Sadəcə, hadisələri olduğu kimi, obyektiv, dəqiq, qərəzsiz şəkildə yayımlamasını istəyirik. Bu günlərdə Laçın-Xankəndi yolu ilə bağlı da dünya mediasında xeyli saxta xəbərlər yayımlandı. Guya Azərbaycan tərəfi yolu bağlayıb. Həmin əraziyə xarici jurnalistlər dəvət olundu. Öz gözləri ilə gördülər ki, yol humanitar məsələlər üçün açıqdır. Müharibə cinayətlərinin yayımlanmasına xarici medianın özünün də marağı olmalıdır. Çünki gördük, Vətən müharibəsi günlərində nə qədər günahsız körpələr, qadınlar qətlə yetirildilər. Gəncənin, Bərdənin, Tərtərin və digər şəhərlərimizin bombalanması, raket atəşinə tutulması - bunlar Ermənistanın əslində cinayətkar bir dövlət olduğunu bütün dünyaya nümayiş etdirmişdi. Amma bununla bağlı daha geniş işlər aparmalıyıq. Xüsusən Azərbaycan jurnalistləri, mətbuatı xarici ölkələrlə əlaqələrini sıx qurmalıdır ki, dünya ictimaiyyəti ermənilərin əsl simasını tanısın”.