“44 günlük Vətən müharibəsində Azərbaycan zəfər çaldıqdan sonra imzalanan üçtərəfli bəyanatla Ermənistan bir sıra öhdəliklər götürdü ki, bunu da yerinə yetirmək məcburiyyətindədir. Amma təəssüf ki, ötən iki il müddətində ermənilər sözügedən öhdəlikləri yerinə yetirmədilər”.
Bu fikirləri açıqlamasında Milli Məclisin deputatı Naqif Həmzəyev bildirib. Onun sözlərinə görə, həmin bəyannamədə qeyd edilən əsas şərtlərdən biri də məhz Zəngilanla Naxçıvan arasında kommunikasiyaların bərpası, işə düşməsi ilə əlaqədardır:
“Məhz Zəngəzur dəhlizindən söhbət gedir. Zəngəzur dəhlizi yalnız dəmir yolu yox, avtomobil, həmçinin gələcəkdə enerji resurslarının ötürülməsində əsas yol kimi planlaşdırılıb. Azərbaycan hazırda öz ərazilərində bu yolun işə düşməsi üçün təxirə salınmadan quruculuq işlərini həyata keçirir. Həm dəmir yolunun, həm də avtomobil yolunun böyük bir hissəsi tikilib. Təxminən 2024-cü ilə qədər həmin proses tam başa çatacaq. Yalnız Ermənistanda təxminən 40 km ərazidə bu yolun bərpası həyata keçirilməlidir. Lakin hələ də rəsmi İrəvan bununla bağlı heç bir fəaliyyət göstərməyib. İstənilən halda ölkəmiz Zəngəzur dəhlizinin açılmasına nail olacaq. Bu, tək Azərbaycan yox, region üçün də böyük əhəmiyyət daşıyan layihədir”.
Deputatın fikrincə, əgər Cənubi Qafqazda sülh, əmin-amanlıq istəyiriksə, Azərbaycan və Ermənistan arasında mütləq sülh müqaviləsi imzalanmalı, sərhədlər tanınmalı və kommunikasiyalar açılmalıdır:
“Zəngəzur dəhlizinin açılmasına qarşı olan region dövlətlərindən birincisi, elə İrandır. Bunun səbəbi isə məlum deyil. Ermənistana da təsir göstərən rəsmi Tehrandır. Belə düşünürlər ki, dəhlizin açılacağı təqdirdə Ermənistan və Gürcüstan üzərindən Avropaya çıxışında müəyyən məhdudiyyətlər yarana bilər. Ancaq İran da gec-tez anlayacaq ki, yolun açılmasının region dövlətlərinə heç bir zərəri yoxdur, əksinə faydası var. Ermənistan üçün isə Zəngəzur dəhlizinin açılması taleyüklü məsələdir. Onsuz da bizim Türkiyə və Gürcüstan üzərindən müəyyən əlaqələrimiz var və beynəlxalq layihələr həyata keçiririk. Ancaq Zəngəzur dəhlizinin açılması həm Naxçıvanın Azərbaycanla quru əlaqələrinin bərpasında, həm də Türkiyə-Azərbaycan quru əlaqələrinin daha yaxın kommunikasiyasının mövcudluğunu təmin edəcək. Ermənistan da bu yollara qoşulmaqla Rusiyaya birbaşa həm dəmiryolu, həm də avtomobil yolu ilə çıxışını təmin edəcək. Lakin bu, biraz zaman tələb edən məsələdir. Düşünürəm ki, 2024-cü ildə Zəngəzur kolidorunun işə düşməsinin şahidi olacağıq “.