Xəbər verdiyimiz kimi, Prezident İlham Əliyev yanvarın 15-də Birləşmiş Ərəb Əmirliklərində işgüzar səfərdə olub .
Əbu-Dabidə Azərbaycan Respublikasının Prezidenti İlham Əliyevin Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan ilə görüşüb.
Dövlət başçısı səfərə dəvətə görə minnətdarlığını bildirib, BMT Təhlükəsizlik Şurasında Cənubi Qafqaz regionuna aid müzakirələrdə Birləşmiş Ərəb Əmirliklərinin Azərbaycana göstərdiyi dəstəyin yüksək qiymətləndirildiyini, bunun dostluğun və qardaşlığın nümunəsi olduğunu deyib.
Prezidentlər Azərbaycanın və Birləşmiş Ərəb Əmirliklərinin sülhsevər dövlətlər olduqlarını qeyd ediblər, regionda sülhün, sabitliyin və təhlükəsizliyin təmin edilməsi işində göstərdikləri səyləri vurğulayıblar. Söhbət zamanı Azərbaycan ilə Birləşmiş Ərəb Əmirliklərinin siyasi, iqtisadi, təhlükəsizlik və digər sahələrdə sıx əməkdaşlıq həyata keçirdikləri bildirilib, bu əlaqələrin daha da genişləndirilməsinin vacibliyi vurğulanıb.
Dövlət başçıları tərəfindən müəyyənləşdirilmiş siyasi xəttə uyğun olaraq, iki ölkənin müxtəlif səviyyələrdə nümayəndə heyətlərinin qarşılıqlı səfərlərinin önəmi qeyd edilib.
Yanvarın 16-da isə Birləşmiş Ərəb Əmirliklərinin paytaxtında Əbu-Dabi Dayanıqlılıq Həftəsinin rəsmi açılış mərasimi keçirilib. Prezident İlham Əliyev də tədbirdə iştirak edib.
Qeyd edək ki, Azərbaycan və Birləşmiş Ərəb Əmirlikləri arasındakı ikitərəfli əməkdaşlıq əlaqələri yüksələn xətt üzrə inkişaf edir. Son illər bütün sahələrdə tərəflər arasındakı sıx əməkdaşlıq əlaqələrinin daha da genişlənməsini xüsusi qeyd etmək lazımdır.
Prezident İlham Əliyevin də dediyi kimi, Azərbaycan ilə Birləşmiş Ərəb Əmirlikləri arasında münasibətlər strateji əhəmiyyətə malikdir. Prezidentin son səfəri də bunu bir daha sübut etdi və Azərbaycan ilə Birləşmiş Ərəb Əmirlikləri arasındakı münasibətlərin necə yüksək səviyyədə olduğunu göstərdi.
Milli Məclisin deputatı Naqif Həmzəyev açıqlamasında bildirib ki, Azərbaycan və Birləşmiş Ərəb Əmirlikləri arasındakı münasibətlər strateji əhəmiyyət kəsb etməkdədir:
“Azərbaycan Birləşmiş Ərəb Əmirlikləri ilə birlikdə enerji resurslarının işlənməsi və onun ixracından əldə olunan gəlirlərdə çox böyük potensial görməkdədir.
Azərbaycan artıq bir neçə ildir özünün enerjiyə olan təlabatını tam olaraq ödəyir. Bu baxımdan ölkəmizdə istehsal edilən xam neftin, neft məhsullarının, təbii qazın, eləcə də digər enerji resurslarının Avropa və dünya bazarlarına ixracını da gerçəkləşdirə bilib.
Dünya okeanlarına çıxışı olmamasına baxmayaraq, Azərbaycan Cənubi Avropaya uzanan 3500 kilometr uzunluğundakı boru kəmər şəbəkəsini qurub və bunun vasitəsilə enerji resurslarının Avropaya ötürülməsi mümkün olub.
Artıq 19 milyard kubmetr qaz ixrac edilib. Yaxın gələcəkdə isə bu rəqəm 24 milyard kubmetrə çatdırılacaqdır. Yalnız Cənubi Avropa ölkələrində deyil, Balkan dövlətləri də Azərbaycan qazından istifadə edə biləcək. Bununla yanaşı, Azərbaycan alternativ enerji mənbələrinin işlənməsi və “yaşıl enerji”nin Avropaya nəql edilməsi ilə bağlı da layihələr reallaşdırmağı planlaşdırır. Artıq bununla bağlı ilkin razılaşmalar da əldə olunub”.
Millət vəkili qeyd edib ki, ölkəmizdə bu sahədə çox böyük potensial var:
“Quruda 10 qeqavatlıq, işğaldan azad olunmuş ərazilərdə 27 qeqavatlıq günəş və külək enerjisi, dənizdə isə 157 qeqavatlıq “yaşıl enerji” resursları var.
Bu, çox böyük potensialın olmasından xəbər verməkdədir. Belə bir potensial olduğu təqdirdə, Azərbaycan yeni marşutlar üzərində işləməlidir. Artıq bununla bağlı da layihələr reallaşdırılıb. Ötən ilin dekabr ayında biz Gürcüstan üzərindən keçməklə, Xəzər dənizinin dibi ilə Avropaya çəkiləcək yeni “yaşıl enerji” dəhlizinin razılığının əldə olunmasının şahidi olduq. Cənab Prezident bu böyük və gələcəyə hesablanan layihənin də reallaşmasına nail oldu.
2027-ci ilə qədər 4 qeqavat gücündə “yaşıl enerji”nin məhz bu dəhliz vasitəsi ilə Avropaya nəql edilməsi planlaşdırılmaqdadır. Belə bir marşrut hazır olduğu təqdirdə, biz enerji resurslarının istehsalına başlamalıyıq. SOCAR ilə Birləşmiş Ərəb Əmirliklərinin “Masdar” şirkəti arasında ilkin razılığa əsasən, 4 qeqavat gücündə günəş və külək enerjisinin istehsalına başlanılacaqdır. Bu istehsal olunacaq “yaşıl enerji” 2027-ci ilədək Avropaya nəql ediləcəkdir. Bu, yaxın mərhələdə nəzərdə tutulan bir layihədir. Uzaq mərhələdə isə istehsalın gücünün 10 qeqavata çatdırılması hədəflənib”.
Naqif Həmzəyev vurğulayıb ki, “Masdar” şirkəti ilə birlikdə məhz işğaldan azad olunmuş ərazilərdə alternativ enerji mənbələrinin də istehsalına başlanacaqdır:
“Biz bilirik ki, Birləşmiş Ərəb Əmirliklərinin texnoloji sahədə çox böyük nailiyyətləri var. Faktiki olaraq, səhralıqda böyük şəhərlər, həm də gələcəyin şəhərlərini qura bilib.
Burada çox müasir texnoloji yeniliklər tətbiq edilib. Bu baxımdan, Azərbaycan bu sahədə də Birləşmiş Ərəb Əmirlikləri ilə yaxından əməkdaşlıq etmək və Şərqi Zəngəzur və Qarabağda qurulacaq “ağıllı şəhər” və “ağıllı kənd” konsepsiyalarında da məhz bu texnoloji yeniliklərdən istifadə etmək niyətindədir.
“Masdar” şirkəti ilə SOCAR arasında əldə edilmiş razılığa əsasən, Qarabağ və Şərqi Zəngəzurda tikiləcək binaların dam örtüklərində günəş panellərinin yerləşdirilməsi də birlikdə işlənəcəkdir.
Bir sözlə, Birləşmiş Ərəb Əmirlikləri və Azərbaycan arasında əməkdaşlıq üçün çox böyük perspektivlər var. Bu cəhətdən, Azərbaycanın münasibətlərin inkişafına strateji əhəmiyyət verməkdədir. Tərəflər arasındakı münasibətlər artan xətt üzrə inkişaf edir. Düşünürəm ki, yaxın gələcəkdə də bu münasibətlər inkişaf etməyə davam edəcəkdir”.