"Azərbaycanda gənclər siyasəti uğurla həyata keçirilir".
Bu fikirləri açıqlamasında Milli Məclisin deputatı Naqif Həmzəyev deyib.
Deputat bildirib ki, Cənab Prezident ötən gün idmançılarla görüşdə mühüm məqamlara toxunub:
"Cənab Prezident İlham Əliyev idman yekunları ilə bağlı idmançılarla görüş keçirdi. Bu görüşdə çox maraqlı məqamlara toxunuldu. Azərbaycan idman ölkəsi olaraq dünyada tanınır. Azərbaycan idmançıları Azərbaycan bayrağını həmişə yüksəklərdə dalğalandırır. Azərbaycan idmançıları həmişə ən yüksək yerləri tuta bilirlər. Çoxlu sayda qızıl, gümüş medallar gətirirlər. Bir sözlə, Azərbaycan gənclər siyasəti uğurla həyata keçirilir. Ancaq bütün bunlarla yanaşı, dünən Cənab Prezident İlham Əliyev maraqlı məqamlara toxundu. Xüsusilə də, idmanın, sağlam həyat tərzinin vətəndaşlar, sadə insanlar arasında təbliğinin önəmli olduğunu bildirdi. Azərbaycanda - paytaxt Bakı şəhərindəki parklarda idman alətlərinin yerləşdirildiyini və bu ənənənin Azərbaycanın bütün şəhər və rayonlarda davam etdirilməsinin vacibliyini vurğuladı. Bu isə birbaşa olaraq insanlar arasında kütləvi marağı artıracaqdır. Bu, çox vacib nüansdır".
Millət vəkili bildirib ki, Prezident İlham Əliyevin uğurlu idman siyasəti nəticəsində sadə insanlar arasında idmana maraq daha da artır:
"Yüksək inkişaf etmiş ölkələrdə yol boyu parklarda, açıq havada çoxlu sayda idman alətləri var ki, normal vətəndaşlar uşağından tutmuş böyüyünə qədər bu idman alətlərindən pulsuz olaraq istifadə edirlər. Nəticə etibarilə, insanlar arasında idmana maraq daha da artır. Yalnız professional idmançılar deyil, həm də sadə vətəndaşlar arasında da sağlam həyat tərzi təbliğ edilir və adi bir həyat tərzinə çevrilir. Bütün bunlarla yanaşı, Cənab Prezident işğaldan azad olunmuş ərazilərdə idmanın inkişafı ilə bağlı məsələlərə də toxundu. Bilirik ki, Qarabağ və Şərqi Zəngəzurda quruculuq, abadlıq işləri həyata keçirilir. Şəhər və rayonların baş planları təsdiqlənir. Bu baş planlara uyğun olaraq, infrastruktur layihələr həyata keçirilir. Cənab Prezident Ağdamda "Qarabağ" klubunun "İmarət" stadionu və onun yanında böyük olimpiya idman kompleksinin tikiləcəyi mesajını da verdi. Bununla yanaşı, digər rayon və şəhərlərdə də böyük idman komplekslərinin, idman mərkəzlərinin tikilməsinin vacibliyini vurğuladı. Bir sözlə, Azərbaycanın bütün rayon və şəhərlərində olduğu kimi, idman mərkəzləri və olimpiya kompleksləri işğaldan azad edilmiş ərazilərdə də tikiləcəkdir. Nəticə etibarilə, düşünürük ki, iqlimi, hava şəraiti uyğun olan, daha xoş olan bu ərazilərdə çox uğurlu idmançılar yetişəcək".
Deputat sonda qeyd edib ki, hər birimiz Prezidentin uğurlu təbliğat işlərini dəstəkləməliyik və gənclərimizin savadlı və bilikli yetişməsi üçün əlimizdən gələni etməliyik:
"Azərbaycan məhz Cənab Prezident İlham Əliyevin rəhbərliyi dövründə ideoloji, vətənpərvər təbliğat işlərini uğurla həyata keçiribdir. Bunun nəticəsidir ki, 44 günlük Vətən Müharibəsində Azərbaycan gəncləri yalnız foto və videolarda gördükləri Qarabağ torpağı üçün vuruşdular, döyüşdülər və öz canlarını torpaq, vətən yolundan qurban verdilər. Biz fəxr edə bilərik ki, Azərbaycanın bu cür mərd və qəhrəman gəncləri yetişdi. Bu gün Azərbaycanda minlərlə qazi var ki, onlar da canlı şəhidlərdir. Onlar müharibəni yaşayıblar, şəhidlik zirvəsinin bir anında olublar. Öz əzalarını və sağlamlıqlarını itiriblər. Görünən odur ki, həm idmançılarımız, həm də gənclərimiz vətənpərvər ruhda yetişiblər. Biz bu yolu davam etdirməliyik. Təbliğat işlərini gücləndirməliyik. Tarixi köklərimizə sadiq qalmalıyıq. Gənclərimizin savadlı, bilikli yetişdirilməsi üçün hər birimiz səfərbər olmalıyıq. Düşünürəm ki, Cənab Prezidentin həyata keçirdiyi gənclər siyasəti öz məntiqi nəticəsini 44 günlük Vətən Müharibəsində göstərdi. Bu gün də Azərbaycan gəncləri bütün platformalarda, o cümlədən idman sahəsində Azərbaycanı uğurla təmsil edirlər. Ümid edirik ki, növbəti idman yarışlarında daha böyük uğurlara imza atacaq".