Ənənəvi olaraq, ölkə Prezidenti bayram günlərində, bir sıra əlamətdar tarixlərdə əfv sərəncamları imzalayardı. Bu dəfə fərqli bir vaxtda, ölkəmizin koronavirus pandemiyası kabusu ilə çarpışdığı vaxtda imzalanan əfv sərəncamı bir daha onu nümayiş etdirdi ki, statusundan, tutduğu mövqedən asılı olmayaraq hər bir ölkə vətəndaşı Prezident İlham Əliyevin diqqət mərkəzindən kənarda qalmır.
Bunu Day.Az saytına Milli Məclisin deputatı Naqif Həmzəyev bildirib. Millət vəkili qeyd edib ki, Ulu öndər Heydər Əliyevin humanizm ənənələrini davam etdirən dövlət Başçısının siyasi iradəsi və qətiyyəti nəticəsində imzalanan əfv sərəncamı nəticəsində 176 nəfər azadlığına, ailəsinə qovuşması, ailəsinə sevinc aparması ölkəmizdə həyata keçirilən humanizm siyasətinin parlaq nümunəsidir. Eyni zamanda dar gündə də, xoş gündə də vətəndaşının yanında olan, onların sevincinə də, kədərinə də şərik çıxan Prezidentimiz İlham Əliyevin həyat amalının xalqın maddi-rifahının, həyat şəraitinin, təhlükəsizliyinin təmin edilməsi olduğunun təsdiqidir.
“Qlobal pandemiyanın Azərbaycandan yan keçmədiyi belə bir çətin vaxtda dövlətin əhalinin təhlükəsizliyi baxımından önləyici addımlar atmasını zəruri edib. İlk gündən Prezident İlham Əliyevin qəbul etdiyini çevik qərarlar, ciddi qabaqlayıcı tədbirlər ölkənin hər bir vətəndaşının koronavirus təhlükəsindən qorumaq məqsədi daşıdı. Bu da dünya dövlətləri ilə müqayisədə Azərbaycanda koronavirusun yayılma ehtimalının qarşısını almağa müsbət təsir göstərdi. Aprelin 20-dək ölkəmizdə xüsusi karantin rejiminin elan edilməsi, əhalinin evdə qalmasını təmin etmək, sosial izolyasiya tədbirlərinin genişləndirilməsi, müstəqillik tariximizin ən böyük iqtisadi dəstək proqramının – pandemiyanın iqtisadiyyata mənfi təsirini minimuma endirəcək, makroiqtisadi sabitliyi qoruyacaq vətəndaşların sosial müdafiəsi ilə bağlı paketin hazırlanması “Biz birlikdə güclüyük!” şüarının təsdiqi oldu”-Naqif Həmzəyev əlavə edib.
Koronavirusla bağlı görülən tədbirlərin davamı olaraq hər gün 120 min tibbi maska istehsal ediləcək müəssisənin fəaliyyətə başlaması təqdirəlayiq hal oldduğunu bildirən millət vəkili bildirib ki, koronavirus pandemiyası ilə əlaqədar tələbatın kəskin artması səbəbindən bütün ölkələrdə tibbi maskanın qıtlığı yaşanır. İstehsalçı ölkələr isə tibbi maska ixracını dayandırmaqla yanaşı, istehsal avadanlığı və xammalın ixracını da saxlayıblar.
Əhalinin sağlamlığının təmin olunması məsələsi hər zaman öndə gəldiyi üçün dövlətimizin Başçısı bu dəfə də alqışalayiq addım atdı. Prezident İlham Əliyevin tapşırığına əsasən, qısa müddətdə tibbi maska istehsalı avadanlığı və xammalı Azərbaycana gətirildi. Bu mühüm hadisə bir daha xalqı əmin etdi ki, koronovirus pandemiyasının dünyanı ağuşuna almaqda davam etdiyi bir vaxtda,onların sağlamlığı, təhlükəsizliyi diqqət mərkəzindədir.
Ölkəmizdə yerli tibbi maska istehsalı koronavirusla mübarizəyə mühüm töhfə olmaqla, süni qiymət artımına son qoymaqla yanaşı, müstəqil dövlətimizin bu sahədə başqa ölkələrdən asılılığının qarşısını almağa yönələn addım oldu. Həmçinin, bu addım Prezident İlham Əliyevin əhalinin sağlamlığının qorunması məsələsinə nə dərəcədə diqqətlə və həssas yanaşmasını bir daha sübut etdi.
Bu gün tibbi maskalara ölkə vətəndaşlarının ehtiyaçının təmin edilməsi, daxili tələbatı ödəmək öndə dayanan məsələlərdəndir.4 milyon sərmayə qoyulan müəssisənin fəaliyyətə başlamasının da əsas məqsədi vətəndaşların sağlamlığına xidmət etməkdir. Aydın məsələdir ki, koronavirusla mübarizə başa çatdıqdan sonra Azərbaycan bu sahədə artıq idxaldan asılı olmayacaq və yerli istehsalı genişləndirmək istiqamətində addımlar atacaq-deyə Naqif Həmzəyev vurğulayıb.